ताम्सालिङ प्राप्तिको आन्दोलन सफल नहुन्जेल ITCकाेमूल उदेश्य ताम्सालिङ प्राप्ति नै हुनुपर्छ

ताम्सालिङ प्राप्तिको आन्दोलन सफल नहुन्जेल ITCकाेमूल उदेश्य ताम्सालिङ प्राप्ति नै हुनुपर्छ




अन्तराष्ट्रिय तामाङ परिषद (ITC) को चौथो सम्मेलनको लागि विश्वभरिका तामाङहरु जुट्दै गर्दा एक किसिमको उत्सवको महशुस भएको छ l यो उत्सवलाई साकार र औचित्यपूर्ण बनाउन सम्पूर्ण तामाङ र तामाङ संघसंस्थाहरु लाग्नुपर्छl
संस्था आफैमा गलत हुदैन, गलत त संस्थाको नेतृत्व गर्ने व्यक्ति हुन् जसको नियत गलत भयो र असक्षम भयोभने संस्था नै बदनाम हुनपुग्छ l ITC स्थापना भएको १५-१६ वर्ष भयो तर केहि उपलब्धिहरु भएन र यस अन्तरालमा नेतृत्वमा आएकाहरु कसैले पनि सिन्को भाच्न सकेन, बरु ITC राजनीति गर्ने व्यक्तिहरुको पन्जामा पर्यो भन्ने आरोपहरु सुन्नमा आए, यसको गहन रुपमा समिक्षा हुनुपर्छ र यसबाट पाठ सिक्दै अबको स्पष्ट बाटो/कार्यदिशा तय गर्नुपर्छ l विश्वभरिको तामाङहरुलाई एकताको शुत्रमा बाँध्न फूलहरु उनेर माला बनाउने धागोको काम ITC ले गर्नुपर्दछ l
तामाङ एकतालाई मजबुत बनाउन ITC को भूमिका महत्वपूर्ण हुनुपर्दछ l तामाङ एकता भन्नाले तामाङभित्र भएको विविधता हो l भुगोल अनुसार तामाङहरुको भाषा, भेषभुषा, संस्कारसंस्कृति फरक छन् l एकले अर्काको सम्मान गर्नु, एकले अर्कालाई महत्व दिनुपर्छ अनि मात्रै तामाङ एकता सम्भव देखिन्छ l भाषा, भेषभुषा, संस्कारसंस्कृति फरक भएकै कारण भोली तामाङभित्र फाटो नआओस l यो विविधताहरुको सम्रक्षण तथा सम्बर्द्वन गर्नु जरुरी छ , किनकी विविधता तामाङको विशेषता हो भन्ने मलाई लाग्छ l यसार्थ सम्मेलनमा विविधताले ठाउँ पाउनेछ भन्ने आशा राखेकोछु l
ITC समुदायको आर्थिक, समाजिक, साँस्कृतिक र शैक्षिक रुपान्तरणको लागि एउटा कडी बनोस् र विशेष गरी ताम्सालिङ प्राप्तिको लागि घेदुङ्ले शुरु गरेको आन्दोलनको लागि विश्वभरीको तामाङहरुलाई एउटै मालामा उनेर शक्ति संचित गर्दै घेदुङको मेरुदण्ड बनोस् / बन्नुपर्छ l ताम्सालिङ प्राप्तिको आन्दोलन र समुदायको हक र हितको लागि लड्ने तागत बन्नुपर्दछ साथै आन्दोलन सफल नहुन्जेलसम्मको लागि ITC को मूल उदेश्य ताम्सालिङ प्राप्ति नै हुनुपर्छ भन्ने लाग्छ l आलोपालो सिस्टम र यस पटक नेतृत्व गर्ने पालो भारतको भन्दै गर्दा, के भारतकोले नेतृत्व गर्दा घेदुङको आन्दोलनलाई सहयोग गर्ला ?? विचारणीय प्रश्न छ,
अब बन्ने टिमको लागि चुनौती र अवसरको त पहाड नै देखिन्छ, अर्को अर्थमा भन्ने हो भने फलामको चिउरा बराबर नै हुनेछ किनकी १५-१६ वर्षको अन्तरालमा हुन नसकेको कामहरु अब बन्ने टिमले गर्नुपर्ने छ, ITC सम्मेलनको औचित्य सिद्द गर्नुपर्ने छ, सबैको विश्वास जित्दै ITC लाई सम्पूर्ण तामाङहरुको आशा र भरोसाको केन्द्र बनाएर देखाउनु पर्नेछ, ITC को विकल्प खोज्नुपर्छ भन्नेहरुको मुख टाल्नु पर्नेछ, ITC व्यक्तिगत स्वार्थको लागि राजनीति गर्ने थलो हो भन्ने कुरा गलत साबित गर्नुपर्नेछ l त्यसैले अब बन्ने टिम लरतरको टिमले हुने वाला छैन l अब चयन हुने नेतृत्वसँग विचार, दुरदर्शिता, कार्य योजना मात्रै हैन इच्छाशक्तिले भरिपूर्ण व्यक्तिको खाँचो छ र कुनै राजनीतिक पार्टीमा लागेको भए पार्टी र व्यक्तिगत स्वार्थ भन्दा माथि उठेर समुदायको बारेमा सोच्न सक्ने अनि grass root लेबलको तामाङ्समेतको भावना, पिडा, वेदना बुझ्न सक्ने व्यक्तिको आवश्यकता छ l त्यस्तो नेतृत्वले मात्रै समुदायको विकास र उन्नतिको लागि योगदन दिन सक्छ l
त्यसैले एउटा कुशल नेतृत्वसहित इच्छाशक्तिले भरिपूर्ण टिम बनाउन सफल होस् जसले गर्दा समुदायको विकासको खाका ल्याउन सकोस् र कार्यन्वयन गर्न/गराउन सकोस् l
सम्मेलन सभ्य र भव्य रुपमा सम्पन्न गर्दै जुझारु, दुरदर्शी, तामाङको मूल मुद्दाहरु बुझ्ने, इच्छाशक्तिले भरिएको, केहि गरौ भन्ने भावना भएको नयाँ टिम बनाउन सफलता मिलोस् र सम्मेलन पश्चात तामाङमाझ नयाँ उत्साह र उमङ्ग छाउनेछ भन्ने आपेक्षसहित सम्मेलन पूर्ण सफलताको हार्दिक शुभकामना व्यक्त गर्दछु l थुजिछे l l

सरोज तामाङ
के. उपाध्यक्ष
नेपाल तामाङ समाज, जापान

हाम्रो बारेमा


हाम्रो टिम


समायोजन खबर मिडिया ग्रुप प्रालिद्धारा सञ्चालित समायोजन खबर डटकमका लागि
अध्यक्ष चिसाङ शेर्पा
सम्पादक फुर्वा शर्पा
प्रेस काउन्सिल नेपाल दर्ता नं. ३०९÷०७५÷०७६
सूचना तथा प्रसारण विभाग दर्ता नं. ९८२÷०७५÷०७६

सम्पर्क


स्थायी लेखा नम्बर– ६०६६८६२५७
ठेगाना : दिक्तेल खोटाङ
सम्पर्क नं. ९८५२८४९४९५
इमेल : [email protected]



© 2019 Samayojan Khabar All Right Reserved | Site by : SobizTrend Technology