समायोजन खबर खोटाङ, खोटाङको केपिलासगढी गाउँपालिकाले ४७ करोड ५१ लाख ५ हजार १७० रुपैयाँ बजेट ल्याएको छ।

गाउँपालिकाको सभाहलमा मंगलबार भएको १९ औं गाउँसभामा गाउँपालिका उपाध्यक्ष गुरुराज राईले आर्थिक वर्ष २०८३/०८४ का लागि उक्त बजेट प्रस्तुत गरेका हुन्। बिनियोजित कूल बजेटबाट पूंजिगत खर्चलाई १७ करोड १२ लाख ५१ हजार र चालू खर्चलाई ३० करोड ३८ लाख ५४ हजार १७० रुपैयाँ बिनियोजन गरिएको छ।

क्षेत्रगततर्फ आर्थिक विकासलाई ६ करोड १ लाख २६ हजार ८६०, सामाजिक विकासतर्फ २२ करोड ७५ लाख ६२ हजार ५००, पूर्वाधार विकासतर्फ ९ करोड १५ लाख ८० हजार ६१५, सुशासन तथा अन्तर सम्बन्धित क्षेत्रलाई ८९ लाख ५० हजार ५०० र कार्यालय सञ्चालन तथा प्रशासनिकतर्फ ८ करोड ६८ लाख ८४ हजार ६९५ रुपैयाँ बिनियोजन गरिएको प्रमुख प्रशासकीय अधिकृत सौधन राईले जानकारी दिए।

गाउँपालिकाले शिक्षालाई मात्र १६ करोड ८५ लाख ६८ हजार ५१०, कृषिमा ४ करोड ३७ लाख ५१ हजार ६४०, स्वास्थ्यमा ३ करोड ५६ लाख ८५ हजार ६६८, खानेपानीलाई २ करोड ९१ लाख १२ हजार ५००, पर्यटनमा १ करोड ६१ लाख ११ हजार, सिंचाईमा १० लाख ५० हजार र विपद व्यवस्थापन कोषमा १० लाख रुपैयाँ बजेट बिनियोजन गरिएको छ। शिक्षा, स्वास्थ्य र कृषिलाई प्राथमिकता दिंदै बजेट बिनियोजन गरिएको गाउँपालिका अध्यक्ष समिर राईले बताए।