काठमाडौं, ९ चैत । किरात धर्म तथा साहित्य उत्थान संघ तेह्थुमको अगुवाईमा सदरमुकाम म्याङलुङमा निर्माण गर्न लागिएको माङ हिमका लागि सहयोग रकम जुट्ने क्रम जारी छ ।
हङकङमा बसोबास गर्दै आउनु भएका गीता पालुङवा र इजरायलमा बसोबास गर्दै आउनु भएका भीमा नेम्बाङ न्यौपानेको अगुवाइमा संकलन गरिएको ३ लाख ४२ हजार ७६ रुपैयाँ सहयोग रकम बुधबार हस्तान्तरण गरिएको छ । पालुङवा र न्यौपानेको पहलमा विभिन्न देशमा बसोबास गर्ने नेपालीहरु मार्फत संकलन गरिएको उक्त रकम किरात धर्म तथा साहित्य उत्थान संघ तेह्थुमका अध्यक्ष राजकुमार तेयुङलाई काठमाडौंमा एक कार्यक्रम गरी हस्तान्तरण गरिएको हो ।
हिलिहाङ हाक्पारे पालाम सयङको अगुवाइमा नेपाल प्रज्ञा प्रतिष्ठानका पूर्व कुलपति बैरागी काइलाले सहयोग रकम हस्तान्तरण गर्नु भएको हो । सहयोग रकम हस्तान्तरण गर्दै पूर्व कुलपति काइलाले आफ्नो छाक काटेर सहयोग गरेको भन्दै सहयोगीहरुको प्रसंसा गर्नु भयो ।
