समायोजन खबर ओखलढुङ्गा,
घरमाथिबाट आएको पहिरोले घर पुरिँदा एकै घरका आमाछोरीको मृत्यु भएको छ । ओखलढुङ्गाको मोलुङ गाउँपालिका–७ पात्लेमा घरमाथिबाट आएको पहिरोले घर पुरिँदा घरभित्र रहेका ४० वर्षीया पुटी शेर्पा र उनका छोरी १० वर्षीया याङ्जी शेर्पाको मृत्यु भएको हो ।

शनिबार बिहान करिब १० बजेतिर घरमाथिबाट एक्कासी खसेको पहिरोले घरलाई पुरेपछि घरभित्र रहेका उनीहरुको मृत्यु भएको मोलुङ गाउँपालिका–७ पात्लेका वडाअध्यक्ष हेम कुमार सुनुवारले जानकारी दिए । पानी पर्न रोकिएपछि शेर्पाका श्रीमान घरबाहिर निस्किएको ५ मिनेटमै घरमाथिको सडक हुँदै आएको पहिरोले आमा छोरीको मृत्यु भएको बताइएको छ ।

घरभित्र एउटै खाटमा आमाछोरी सुतिरहेको अवस्थामा पहिरोले पुरिएर मृत्यु भएको वडाअध्यक्ष सुनुवारले बताए । शेर्पाका श्रीमान घरबाहिर निस्किएकाले बाँच्न सफल भएका छन् । ढुंगामाटोले बनेको घर पहिरोका कारण पूर्ण रुपमा ध्वस्त भएको छ । पहिरोले घर पुरिएपछि वडाअध्यक्ष सुनुवारसहित १०० बढी स्थानीयको सहयोगमा उद्धार गर्ने क्रममा एउटै खाटमा दुई आमाछोरीको शव फेला परेको हो ।
२०७६ असार २८ गते साँझ ५ :५६ मा प्रकाशित