काठमाडौं, मंसिर ६ सरकारले चुनावी परिणामलाई प्रभावित पार्न पहिलो चरणमा चुनाव हुने चार जिल्लामा प्रमुख जिल्ला अधिकारीको सरुवा गरेको छ ।

निर्वाचन आचारसंहिता लागू भएको अवस्थामा कुनै पनि तहका कर्मचारी सरुवा गर्न नपाइने भए पनि सिडियो जस्तो जिल्लाको सम्पूर्ण सुरक्षा तथा प्रशासनिक नेतृत्व गर्ने कर्मचारीलाई नै सरकारले सरुवा गरेको हो । गृहमन्त्रालयले भोजपुर, सोलुखुम्बु, रसुवा र नुवाकोट जिल्लाका प्रमुख जिल्ला अधिकारी सरुवा गरेको छ । गृहमन्त्रालयका प्रवक्ता नारायणप्रसाद शर्मा दुवाडीका अनुसार भोजपुरमा फडिन्द्र दाहाल, सोलुमा सुनिल खनाल, रसुवामा चोमेन्द्र न्यौपाने र नुवाकोटमा विरेन्द्र यादवलाई पठाइएको छ ।

पाँच दिनपछि हुने मतदानमा यसअघि भएका सिडियोले कांग्रेसलाई सहयोग नगर्ने जिल्लाका पार्टी नेतृत्वको सिफारिसमा गृहमन्त्रीसमेत रहनुभएका प्रधानमन्त्री शेरबहादुर देउवाले सरुवा गर्न निर्देशन दिनुभएको स्रोतको भनाइ छ ।