चिसाङ शेर्पा भदौ÷२३ खोटाङ,
खोटाङको चार वडामा १८६ महिलाको पाठे घर खसेको तथ्यांक सार्वजनिक भएको छ । पाठेघर खस्ने समस्या रोकथाम तथा न्यूनीकरणका क्षेत्रमा काम गर्दै आएको वाताबरण कृषि तथा विकास केन्द्र (केड)ले सार्वजनिक गरेको तथ्यांक अनुशार दिप्रुङ गाउँपालिका, ऐसेलुखर्क र केपीलासगढी गाउँपालिकाको चार वडामा पाठेघर खसेका महिलाको संख्या अधिक पाइएको उल्लेख छ ।

दिप्रुङ गाउँपालिका–१ याम्खाका ३५ जना, दिप्रुङ गाउँपालिका–७ टेम्माका ६० जना, ऐसेलुखर्क गाउँपालिका–१ राखाबांदेलका ६५ जना र केपीलासगढी गाउँपालिका–६ दिप्सुङका २६ महिलाको पाठेघर खसेको पाइएको वाताबरण कृषि तथा विकास केन्द्रकी खोटाङ संयोजक सुजता श्रेष्ठले बताईन् ।

शुक्रबार दिक्तेलमा आयोजित आङ खस्ने सवाल र प्रजनन् अधिकार विषयक सञ्चारकर्मीसँगको अन्तरक्रिया कार्यक्रममा केन्द्रले अधिकांश महिलाले पाठेघर खस्ने समस्यालाई लुकाई रहेको पाइएको जनाएको छ । पहिचान भएका अधिकांश महिलाको आङ योनीको मुखमा वा योनीबाहिरै निस्किसकेको पाइएको संयोजक श्रेष्ठको भनाई छ । जिल्लामा करिव १७ प्रतिशत महिलाको पाठेघर खसेको अनुमान छ ।