पूर्वको पशुपति भनेर चिनिने खोटाङको धार्मिक तथा पर्यटकीयस्थल  हलेसी मन्दिरमा पर्यटकको भीड लाग्ने गरेको छ । दूधकोसीमा अस्थायी बेलिब्रिज बनेपछि  हलेसीमा आन्तरिक तथा बाह्य पर्यटकको संख्या बढेको छ ।
मध्यपहाडी लोकमार्ग अन्तर्गत दिक्तेल–घुर्मी सडक खण्डअन्तर्गत खोटाङ र ओखलढुंगाको दूधकोसीस्थित जयरामघाटमा अस्थायी बेलिब्रिज जडान गरिएपछि हलेसीमा दर्शन गर्न र भ्रमण गर्न आउने पर्यटकको संख्या बढेको हो । बेलिब्रिजका कारण शहरबाट सिधै हलेसी पुग्ने र फर्कने वातावरण बनेपछि आन्तरिक र बाह्य पर्यटकको संख्या बढेको हो । अहिले काठमाडौं, भक्तपुर, ललितपुर, पोखरा, महोत्तरी लगायतका ठाउँबाट तिर्थयात्री तथा पर्यटक गाडी रिजर्भ गरेर सिधै हलेसी आउने जानेक्रम बाक्लिएको छ ।

सिक्किम, दार्जीलिङ लगायतका ठाउँबाट समेत रिजर्भमा दर्शनार्थी हलेसी आइरहेका छन् । चीन, तिब्बत, भारत, भुटान, फ्रान्स लगायतका पर्यटकहरु भने सिधै हेलीकप्टरमार्फत हलेसी आउने जाने गरेका छन् ।