समायोजन खबर खोटाङ, लमजुङको उत्तरी क्षेत्र खुदी भुलभुले केन्द्रविन्दु भएर फेरी भूकम्प गएको छ। राष्ट्रिय भूकम्प मापन तथा अनुसन्धान केन्द्रका अनुसार आज बिहान ८ बजेर २६ मिनेटमा ५ दशमलव ३ म्याग्निच्युडको भूकम्प गएको छ।

आज विहान ५ः४२ बजे पनि सोही ठाउँलाई केन्द्र बनाएर ५ं८ म्याग्निच्युडको भूकम्प गएको थियो ।भूकम्पले घर भत्किँदा विभिन्न स्थानका चार जना घाइते भएका छन्।

घाइते हुनेमा बेँसीशहर नगरपालिका–६ का ३६ वर्षीय उमा गुरुङ, वडा नं ११ चितीका ८३ वर्षीय खकाकुमारी पाण्डे, वडा नं ८ का २९ वर्षीय खुशीमाया गुरुङ र मस्र्याङ्दी गाउँपलिका–६ ठुलीबेँसीका २२ वर्षीय गोविन्द्र अधिकारी रहेको जिल्ला प्रहरी कार्यालय लमजुङले जनाएको छ । प्रहरीका अनुसार उनीहरुमध्ये खुशीमाया र गोविन्द भने भाग्ने क्रममा चोट लाग्न पुगी घाइते भएका थिए।

घाइतेहरुको जिल्ला अस्पताल लमजुङमा उपचार भइरहेको छ। उनीहरुको टाउको, हातखुट्टालगायतका शरीरमा चोट लागेको जिल्ला प्रहरी कार्यालय लमजुङका प्रहरी निरीक्षक जगदीश मिश्रले बताए।