समायोजन खबर खोटाङ,
सोलुखुम्बको तामाखानीमा भालुको आक्रमणबाट २ जना महिला घाइते भएका छन् । भालुको आक्रमणबाट सोलु दूधकुण्ड नगरपालिका ३ तामाखानीका दुई जना महिला घाइते भएका हुन् । आज मध्यान्ह् १२ बजे घर नजिकैको थुम्लिङ जङ्गलमा घाँस काट्न गएका बेला भालुको आक्रमणबाट स्थानीय ४० वर्षका सानु मगर, ४७वर्षका मनकुमारी मगर गम्भीर घाइते भएकोस्थानीय गोर्कण मगरले जानकारी दिए।

भालुको आक्रमणबाट सानु र मनकुमारीको टाउको, घाँटी,ढाड र तिघ्रामा गहिरो चोट लागेको छ । पाँच जनासँगै घाँस काट्न गएपनि अन्य तीन जना भने भागेर ज्यान बचाउन सफल भएका स्थानीयले बताएका छन् । घाइते दुवैको अहिले जिल्ला अस्पताल सोलुखुम्बुमा उपचार भइरहेको छ । जिल्ला अस्पतालमा उपचार सम्भव नभएकाले घाइतेलाई हेलिकप्टरबाट काठमाण्डुल्याउने तयारी भएपनि मौसम खराब भएका कारण हेलिकप्टर आउन सकेको छैन । घाइतेलाई गाडीबाटै काठमाण्डु लैजाने तयारी भईरहेको वडा नम्बर ३ का अध्यक्ष गोपाल मगरले बताए ।
२०७५ भदौ २८ साँझ ६ : १२ मा प्रकाशित