पबन राई खोटाङ, वैदेशिक रोजगार सम्बन्धी कसुरमा दोषी भई फरार रहेका प्रतिवादी पक्राउ परेका छन्। जिल्ला प्रहरी कार्यालय खोटाङबाट खटेको प्रहरीले खोटेहाङ गाउँपालिका–८ सिमपानीका ४५ वर्षीय हरीप्रसाद राईलाई पक्राउ गरेको हो।

पक्राउ परेका राई विरुद्ध जिल्ला अदालत खोटाङबाट प्राप्त लगत अनुसार विभिन्न मितिमा वैदेशिक रोजगार सम्बन्धी कसुरमा ४ वर्ष ३ महिना ६ दिन कैद र १ लाख जरिवाना तोकिएको थियो।

काठमाण्डौ महानगरपालिका–१४ काठमाण्डौमा बसोबास गरिरहेका राईलाई बैशाख २८ गते दिउँसो ३ बजे भक्तपूरस्थित सुर्यविनायक नगरपालिका–५ कटुन्जेमा पक्राउ गरिएको जिल्ला प्रहरी कार्यालय खोटाङका सूचना अधिकारी, प्रहरी निरीक्षक निराजन बस्नेतले जानकारी दिए।

पक्राउ परेका राईलाई काठमाण्डौ जिल्ला अदालतमा उपस्थित गराई कैद भुक्तानका लागी कारागार कार्यालय डिल्लीबजार पठाईएको छ।