२४ फागुन  – जिल्ला विकास समिति सोलुखुम्बुका स्थानीय विकास अधिकारी कृष्णप्रसाद सापकोटा माथि हातपात भएको छ । सोमबार अपरान्ह कार्यकक्षमा नै सापकोटामाथि हातपात भएको हो । सापकोटासँगै जिल्ला विकास समितिका लेखापाल युवराज राईमाथि समेत हातपात भएको छ ।

स्थानीय विकास अधिकारी माथि हातपातमा नेपाल विद्यार्थी संघका जिल्ला नेताहरुका साथमा जिल्ला विकास समितिसँग निकट रहेर काम गर्ने “ड्रिलिप ए एप” का कर्मचारीहरु सम्लग्न भएको कर्मचारीहरुले बताएकाछन् ।
आक्रमणका समयमा नेपाल विद्यार्थी संघका नेताहरु नविन थापा, अश्विनबाबु थापा, जीवन बस्नेतका साथमा “ड्रिलिप ए एफ” का जिल्ला संयोजक अमुल बस्नेत, सब इन्जिनियर बेदराज थापा र कर्मचारीहरु अशोक देवकोटा, देवबहादुर भूजेल र रामबहादुर बस्नेत स्थानीय विकास अधिकारीको कार्यकक्षमा रहेको बताइएको छ ।
स्थानीय विकास अधिकारीलाई हातपात गरेको आरोपमा नविन थापा, अश्विनबाबु थापा, देवबहादुर भूजेल, अशोक देवकोटा र रामबहादुर बस्नेतलाई पक्राउ गरी हिरासतमा राखिएको प्रहरीले जनाएको छ ।
हातपातमा सम्लग्न भनिएका अन्य दुई जनाको खोजी भईरहेको र घटनाका बारेमा अनुसन्धान जारी रहेको प्रहरीले जनाएको छ ।
घटनामा सम्लग्न दोषीहरुलाई कडा भन्दा कडा कानुनी कारबाही गर्न कर्मचारी सम्बद्ध संघसंगठनहरुले माग गरेकाछन् । दोषीलाई कारबाही नभए सबै सरकारी कामकाज ठप्प पार्ने चेतावनी कर्मचारीहरुले दिएकाछन् ।

समाचार श्रेात: सेालुखुम्बु समाचार