समायोजन खबर खोटाङ, खोटाङको केपिलासगढी गाउँपालिकामा शिविर राखेर राष्ट्रिय परिचयपत्र बनाउन सुरु गरिएको छ।

बैशाख १८ गते बाक्सिला, सप्तेश्वर र बासपानीका नागरिकलाई लक्षित गरेर बाक्सिला वडा कार्यालयमा शिविर सञ्चालन गरिएको छ।

बैशाख १९ गते फेदी र खार्ताम्छाका नागरिकका लागि वडा कार्यालय फेदीमा र बैशाख २० गते दिप्सुङ र सुङदेलका जनताका लागि वडा कार्यालय सुङदेलमा शिविर राखिएको गाउँपालिकाका प्रशासकीय अधिकृत सौधन राईले जानकारी दिए।

सामाजिक सुरक्षा भत्ता लिनुहुने लाभग्राहीलाई मध्यनजर गरी शिविरको आयोजना गरिएको हो। शिविर सञ्चालन गर्न डीभाईस जडित उपकरण लिएर जिल्ला प्रशासन कार्यालयका टोली केपिलासगढी पुगेका छन्।

शिविरमा गाउँपालिका अध्यक्ष समिर राई, प्रमुख जिल्ला अधिकारी नरहरि घिमिरे लगायतको उपस्थिति थियो।