समायोजन खबर खोटाङ, खोटाङको केपिलासगढी गाउँपालिकामा तोरी फलाउने कृषकहरुले अनुदान पाएका छन्। किसानहरुले उत्पादन गरेको तोरीको प्रतिपाथी २५० रुपैयाँका दरले अनुदान रकम पाएका हुन्।

आर्थिक वर्ष २०७९/२०८० को स्वीकृत नीति तथा कार्यक्रम अन्तर्गत तोरी खेती प्रोत्साहन अनुदान कार्यक्रम अनुसार आईतबार केपिलासागढी गाउँपालिका–१ फेदीबाट सुरु गरिएको अनुदान वितरण कार्यक्रम बुधबार सुङदेलमा आएर समापन भएको छ।

गाउँपालिका कृषि शाखा संयोजक साइमन गुरुङका अनुसार फेदीका २७ जना कृषकले एक लाख ३२ हजार २५० रुपैयाँ, खार्तम्छाका २८ जना कृषकले एक लाख ३९ हजार ७५० रुपैयाँ र बासपानीका ४६ जना कृषकले एक लाख ६५ हजार अनुदान रकम पाएका छन्।
बाक्सिलाका ७२ जना कृषकले दुई लाख ४० हजार ७५० रुपैयाँ, सप्तेश्वरका २४ जना कृषकले ५७ हजार ७५० रुपैयाँ, दिप्सुङका १३ जना कृषकले ७२ हजार ७५० रुपैयाँ र सुङदेलका १४ जना कृषकले ९१ हजार २५० रुपैयाँ अनुदान पाएका हुन्। कृषि प्राविधिक र वडाका जनप्रतिनिधि घरघर पुगेर उत्पादित तोरीको मापन(तौलिएर) पाथी छुट्याएपछि उत्पादन वापतको अनुदान रकम वाँडिएको गाउँपालिका उपाध्यक्ष गुरुराज राईले बताए।

गाउँपालिकालाई तेलमा आत्मनिर्भर बनाउन तथा तोरी उत्पादनमा किसानलाई प्रोत्साहन गर्ने लक्ष्यले अनुदान रकम वितरण गरिएको केपिलासगढी गाउँपालिका अध्यक्ष समिर राईले बताए। अध्यक्ष राईका अनुसार तोरी प्रशोधन गरी तेल पेल्नलाई गाउँपालिकाले तीनवटा मिल ल्याईसकेको छ। मिल सामूहिक रुपमा वितरण गरिनेछ। आगामी वर्ष शत प्रतिशत तोरी उत्पादन हुने अपेक्षा गरिएको अध्यक्ष राईको भनाई छ।

अनुदान रकम केपिलासगढी गाउँपालिका अध्यक्ष, उपाध्यक्ष तथा सम्बन्धित वडा वडाध्यक्ष लगायतले वितरण गरेका हुन्। आफूले मेहेनत गरेर उत्पादन गरेको तोरीको मुल्याङ्कन गरी गाउँपालिका अनुदान दिंदा कृषकहरु खुशी भएका छन्।