समायोजन खबर खोटाङ, यहाँको केपिलासगढी गाउँपालिकाका नयाँ जनप्रतिनिधि र पुरानो जनप्रतिनिधि बीच आपसमा स्वागत तथा विदाई कार्यक्रम भएको छ। सोमबार गाउँपालिकामा औपचारिक कार्यक्रमका बीच निवर्तमान जनप्रतिनिधिले नवनिर्वाचित जनप्रतिनिधिको स्वागत गरेका छन् भने नवनिर्वाचित जनप्रतिनिधिले पुरानो जनप्रतिनिधिलाई सम्मान सहित बिदाई गरेका छन्।

निवर्तमान गाउँपालिका अध्यक्ष कृष्णकुमार राई, उपाध्यक्ष हिरादेबी वन लगायतले नवनिर्वाचित अध्यक्ष समिर राई, उपाध्यक्ष गुरुराज राई, वडाध्यक्ष र वडा सदस्यलाई स्वागत गरेका छन्।निवर्तमान अध्यक्ष कृष्णकुमार राई र वर्तमान अध्यक्ष समिर राई।

यस्तै, नवनिर्वाचित अध्यक्ष, उपाध्यक्ष लगायतले निवर्तमान अध्यक्ष, उपाध्यक्ष, वडाध्यक्ष र सदस्यलाई दोसल्ला ओढाएर सम्मान–पत्र सहित विदाई गरेका छन्। जिल्लाका १० स्थानीय तहमध्ये केपिलासगढीमा निवर्तमान र नवनिर्वाचित जनप्रतिनिधिबीच हार्दिकतापूर्ण स्वागत तथा विदाई भएको हो।

सोही कार्यक्रममा निर्वाचन अधिकृत राजकुमार राईलाई पनि बिदाई गरिएको छ । निर्वाचन अधिकृत राईले गाउँपालिका अध्यक्षलाई निर्वाचन प्रतिबेदन हस्तान्तरण गरेका छन् ।