चिसाङ शेर्पा खोटाङ,
खोटाङको अर्खौले र राजापानीमा माछापुच्छ्रे बैंकको शाखा रहित बैंकिङ सेवाको सुचारु भएको छ । बचत गर्ने बानीको विकास गराउने उद्देश्यले हलेसी तुवाचुङ नगरपालिका– १० अर्खौले र वडा नम्बर ११ राजापानीमा बैकिङ सेवाको सुरुवात भएको हो ।

अर्खौलेमा स्थापना गरिएको शाखा रहित बैंकिङ सेवाको शनिबार हलेसी तुवाचुङ नगरपालिकाका नगरप्रमुख इवन राईले उद्घाटन गर्नुभएको छ । सोही दिन राजापानीमा स्थापना गरिएको शाखा रहित बैंकिङ सेवाको प्रतिनिधिसभाका सदस्य बिशाल भट्टराईले गर्नुभएको छ । बैकिङ सेवाबाट स्थानीयहरुले आफ्नै गाउँघरमा बसेर दैनिक दुईलाख बचत, दैनिक एक लाखसम्म नगद निकाल्न, नयाँ खाता खोल्न, आईएमई, प्रभु, सिटी एक्प्रेस, हिमाल रेमिट लगायतका ३० वटा रेमिट्यान्सको कारोवार गर्न तथा डिसहोम रिचार्ज लगाउन, विजुली बत्ती, टेलिफोनको विल भुक्तानी, मोवाईलमा रिचार्जजस्त कामहरु गर्न सकिने माछापुछ्रे बैंक हलेसी शाखाका शाखा प्रवन्धक खगेन्द्र बहादुर श्रेष्ठले जानकारी दिए ।

राजापानीमा माछापुच्छ्रे बैंकको शाखा रहित बैंकिङ सेवाको उद्घाटन गर्दै प्रतिनिधिसभा सदस्य बिशाल भट्टराई ।

बैकिङ सेवा सुचारु भएपछि स्थानीयहरुको समय, काम र पैसाको बचत तथा फजुल खर्चमा कमी आउने हलेसी तुवाचुङ नगपालिकाका नगरप्रमुख इवन राईले बताए । नगरप्रमुख राईका अनुसार गत असोज २२ गते स्थापना गरी सञ्चालनमा आईरहेको च्यास्मिटारको शाखा रहित बैंकिङ सेवाले डिकुवा, बाहुनीडाँडा र वडहरेलाई समेटिरहेको छ । अब नगरपालिकाको वडा नं. ६ मंगलटारमा सोमबार र निकट समयमा सल्लेमा माछापुच्छ्रे बैंकको शाखारहित बैंकिङ सेवाको स्थापना गरिनेछ । यससँगै नगरपालिकाको ११ वडाका स्थानीयले आफ्नै घर आँगनबाट बैंकको कारोवार गर्न सक्नेछन् ।

यो पनि पढ्नुहोस
हलेसी तुवाचुङ नगरपालिकाको दुई वडामा शाखा रहित बैंकिङ सेवा
२०७५ पुस ७ गते राती ८ : ०३ मा प्रकाशित