समायोजन खबर खोटाङ, खोटाङको दिक्तेल रुपाकोट मझुवागढी नगरपालिकाले जिल्ला स्तरीय चित्रकला प्रतियोगिता गराउने भएको छ।

“नगर प्रमुखसँग विधार्थी कार्यक्रम” अन्तर्गत सामुदायिक र संस्थागत विद्यालयमा कक्षा १ देखि कक्षा १२ सम्म अध्ययन गर्ने विधार्थीहरुलाई लक्षित गर्दै चित्रकला प्रतियोगिता गराउने भएको हो।

२१ फागुनमा दिक्तेलमा हुने चित्रकला प्रतियोगितामा प्रथम हुनेले १५ हजार, दोश्रो हुनेले १० हजार, तेश्रो हुनेले ५ हजार र सान्त्वना हुने तीनजनालाई जनही २ हजारसहित ट्रफि र प्रमाणपत्र वितरण गरिनेछ।

चित्र मौलिक संस्कृति झल्कने, रेडपाण्डा र थारको महत्व भावमा प्रकट हुने, पर्यावरण, मौसम परिवर्तनको कारण र असर सम्बन्धी दृष्टी झल्कने हुनुपर्ने नगरपालिकाले जनाएको छ।

चित्रकलाको महत्वलाई उजागर गर्दै राष्ट्रिय/अन्तर्राष्ट्रिय स्तरमा आफ्नो उपस्थिति देखाउन नगरपालिकाले गत वर्ष “मुन्दुम अन्तराष्ट्रिय चित्रकला कार्यशाला तथा कला प्रदर्शनी” गरेको थियो

उक्त कार्यशालामा राष्ट्रिय/अन्तर्राष्ट्रिय चित्रकारहरुले नगरपालिकाको विकास, संस्कार, संस्कृति, मौलिक परम्परा झल्काउने गरी कोरेका  दुई सय बढी चित्रहरु दिक्तेलस्थित रत्नपार्कको सपीङ कम्प्लेक्समा “मुन्दुम अन्तर्राष्ट्रिय कला संग्राहलय” निर्माण गरेर प्रदर्शनीमा राखिएको छ।