समायोजन खबर खोटाङ, विपक्षी गठबन्धन सरकार गठनका लागि राष्ट्रपति विद्यादेवी भण्डारीले दिएको तीन दिने समयसीमाको अन्तिम दिन बिहीबार बिहानैदेखि राजनीतिक दौडधूप र भेटवार्ता जारी छन्।

केहीबेर अघिमात्रै माओवादी केन्द्रका अध्यक्ष पुष्पकमल दाहाल कांग्रेस सभापति शेरबहादुर देउवा निवास बूढानीलकण्ठमा भेटवार्ता भएको छ । कांग्रेस र माओवादी कांग्रेस सभापति देउवाको नेतृत्वमा नयाँ सरकार गठनका लागि गृहकार्यमा छन् ।

बिहीबार राति नौ बजेसम्म गठबन्धन सरकारका लागि दाबी पेश नगरे संसदमा ठूलो दलका नेतालाई प्रधानमन्त्री बनाउने विकल्प खुला हुने भएकाले देउवा र दाहाल गठबन्धन निर्माणको निर्णायक कोशिसमा भएको देखिन्छ ।

आजै मात्र देउवा निवासमा जसपाका नेता महन्थ ठाकुर र राजेन्द्र महतोले भेटवार्ता गर्नुभएको थियो । भेटमा नेता ठाकुर र महतोले सभापति देउवासँग आफु र आफ्नो दल नयाँ सरकार गठनको प्रक्रियामा नरहेको अवगत गराउनु भएको समाचार स्रोतको दावी छ ।

जसपाको ठाकुर र उपेन्द्र यादव समूहको एकढिक्का समर्थन नभए गठबन्धन सरकारको अंकगणित पुग्दैन । जसपाको यादव समूहले साथ दिए एमालेको नेपाल समूहका सांसदहरुले राजीनामा दिएमा गठबन्धनको सरकार बन्न सक्ने देखिन्छ । तर नेपाल समूहले आफ्नो स्थिति स्पष्ट नपार्दा विपक्षी गठबन्धनको पक्षमा बहुमतको अंक अझै सुनिश्चत भएको छैन ।

यसैबीच सभापति देउवाले भावी गठबन्धन निर्माणबारे छलफलका लागि आफ्नै निवासमा पदाधिकारी बैठक बोलाउनु भएको छ।