समायोजन खबर खोटाङ, नेकपा एमालेले वरिष्ठ नेता माधवकुमार नेपाल र उपाध्यक्ष भीम रावललाई पार्टी सदस्यबाट निलम्बन गरेको छ ।

पार्टी हितविपरीत गतिविधि गरेको भन्दै उहाँहरु दुवैलाई ६ महिनाका लागि पार्टी सदस्यबाट निलम्वन गरिएको हो । दुवै नेतालाई कारबाही गरिएको पत्र अध्यक्ष केपी शर्मा ओलीले पठाउनु भएको छ ।

पार्टीले सोधेको स्पष्टिकरण चित्त बुझ्दो नभएको भन्दै ६ महिनाका लागि पार्टी साधारण सदस्यबाट नै निलम्बन गरेको पत्रमा भनिएको छ । दुवैलाई पठाइएको पत्रमा आफ्ना विचार र क्रियाकलापहरू सच्याइ पार्टीका पक्षमा आएमा पार्टीले निलम्बन अवधिको बीचमा पनि निलम्बनको अवधि घटाउने निर्णय गर्न सकिने र सच्चिन दिएको मौकालाई पार्टीको कमजोरी ठानी पार्टी विरोधी गतिविधिहरू कायमै राखेमा निलम्बन अवधिको बीचैमा थप कारबाही गर्न सकिने व्यहोरासमेत जानकारी गराइन्छ भनिएको छ ।

यस्तै गतिविधि कायम रहे थप कडाइको कारवाही गर्नुपर्ने हुनसक्ने जनाउ दिदै सच्चिनका लागि यो अन्तिम मौकासमेत पत्रमा भनिएको छ ।