समायोजन खबर खोटाङ,  खोटाङको बाक्सिला–सप्तेश्वर–कादेल–जालपा सडक स्तरोन्नतीको काम तिव्र गतिमा अघि वढेकोे छ । केपिलासगढी गाउँपालिका–४ बाक्सिलावाट सप्तेश्वर कादेल हुंदै दिक्तेल रुपाकोट मझुवागढी नगरपालिका–१२ जालपा निस्कने ११ किलोमिटर सडक स्तरोन्नतीको काम तीव्र रुपमा अगाडी वढेको हो ।

संघीय सरकारको ८२ लाख ५७ हजार ५३६ रुपैयाँ वजेटमा केपिलासगढी गाउँपालिकाले स्तरोन्नती गरिरहेको सडकको काम ५० प्रतिशत सकिएको निर्माण कम्पनीले जनाएको छ । निर्माण कम्पनी रुजन तुवाचुङ नाछिरिङ जेभीका प्रतिनिधि गणेश नाछिरिङ राईले सडक स्तरोन्नतीको काम आधा सकिएको दावि गरे ।

निर्माण कम्पनीका प्रतिनिधि राईका अनुसार अब सोलिङ गर्ने र होम पाइप राख्ने काम वाँकी छ । वाँकी काम आगामी जेठ १५ सम्म सम्पन्न हुने उनले बताए । आगामी असार मसान्तमा सक्नेगरी गाउँपालिका र निर्माण कम्पनीले २०७७ कार्तिक २३ गते सम्झौता गरेको थियो ।

स्तरोन्नती भइरहेको सडकमा ड्रेन खन्ने काम सकिएको फिनिसिङ वाँकी रहेको र ग्याभिङ वालको मात्रै काम ५० प्रतिशत सकिएकाले समग्रमा सडक स्तरोन्नतीको काम ४० प्रतिशत वढी सकिएको गाउँपालिकाका ईन्जिनियर गुन्जन कार्कीले जानकारी दिए ।

स्थानीय सरकार आएअघि ट्रयाक ओपन गरिएको सडकको ग्रेड नमिलेको, साँघुरो भएको र ट्याक्टरसम्म चलाउन असहज भएकाले सडक स्तरोन्नतीको काम अघि बढाइएको केपिलासगढी गाउँपालिका अध्यक्ष कृष्णकुमार राईले बताए । कामको वेलावेला अनुगमन गरिरहेको र जेठमा सक्न निर्देशन दिइएको अध्यक्ष राईले बताए । बर्खामा पनि यातायात चलाउने लक्ष्यले सडक स्तरोन्नतीको काम गरिएकोे गाउँपालिकाले जनाएको छ ।