समायोजन खबर खोटाङ, खोटाङको केपिलासगढी गाउँपालिकामा पर्ने रावाखोलामा निर्माणाधिन झोलुङगे पुलको काम अन्तिम चरणमा पुगेको छ । केपिलासगढी गाउँपालिका –४ बाक्सिला र दिप्सुङको सिमानामा पर्ने रावाखोलामा निर्माणाधिन पुलको काम अन्तिर चरणमा पुगेको हो ।

स्थानीय पूर्वाधार विकास मन्त्रालय पुल्चोक ललितपुरको ७९ लाख (भ्याट बाहेक) वजेटवाट निर्माण भइरहेको झोलुङगे पुलको ९५ प्रतिशत काम सकिएको निर्माण कम्पनी निलगिरी निर्माण सेवाले जनाएको छ । अब पुलको स्टील डेक, साइड जाली र विन डाई (पखेटा)को काम वाँकी रहेको निर्माण कम्पनीका प्रतिनिधि गणेश नाछिरीङ राईले बताए ।

मन्त्रालय र निर्माण कम्पनीवीच १८ महिनामा काम सम्पन्न गर्नेगरी २०७६ सालको चैतमा पुलको सम्झौता भएको थियो । सम्झौता म्याद अघि नै पुलको काम सकिने निर्माण कम्पनीका प्रतिनिधि राईले दावि गरे । सम्झौता गरेर पुलको काम गरेको १ वर्ष भयो । वर्षदिनमै पुलको काम अन्तिम चरणमा पुगेको छ । राईले भने, ‘हप्ता दिनमा पुलको काम सक्छौ ।’

बाक्सिला दिप्सुङ वारपार गर्ने मुख्य बाटोमा झोलुङगे पुल नहुंदा मानिसहरु फट्के साँघुबाट खोला तर्ने गरेको र त्यसरी खोला तर्दा खोलाले बगाएर वर्षेनी मानिसको ज्यान जाने गरेको केपिलासगढी गाउँपालिका अध्यक्ष कृष्णकुमार राईले बताए । खोलामा फट्के साँघु छ । वर्षैपिच्छे साँघु र मानिस नै बगाउदै आएको छ । खोलामा पक्की पुल नहुंदा विद्यालय पढ्ने बच्चालाई समेत बगाएको ईतिहास छ । अध्यक्ष राईले भन्नुभयो, ‘झोलुङगे अनिवार्य थियो त्यो पूरा हुदैंछ ।’