समायोजन खबर खोटाङ, बैतडीको दोगडाकेदार गाउँपालिका–७ की १७ वर्षीया किशोरी भागरथी भट्टको बलात्कारपछि हत्या भएको घटनाको अनुसन्धान अन्तिम चरणमा पुगेको प्रहरीले जनाएको छ ।

माघ २२ गते स्थानीय लबलेक जंगलमा हत्या गरिएको अवस्थामा फेला पर्नुभएकी भट्टको घटनामा संलग्न अपराधिको नजिक पुगिएको प्रहरी स्रोतको दावी छ ।

घटना घटेको सात दिनसम्म पनि कुनै औपचारिक जानकारी नदिएको भन्दै आलोचना खेपिरहेको प्रहरीले अपराधि पत्ता लगाएर छिट्टै सार्वजनिक गर्ने बताएको छ । सुदूरपश्चिम प्रदेश प्रहरी कार्यालयका प्रवक्ता मुकेशकुमार सिंहले घटना संवेदनशील भएका कारण अनुसन्धानमा समय लागेको बताउनुभयो ।

उहाँले भन्नुभयो, ‘हामीले सुरुबाट नै अनुसन्धानलाई संवेदनशील ढंगबाट गरिरहेका छौँ । अपराधि को हो भनेर पुष्टि नहुँदासम्म धेरै कुराहरु भन्न मिल्दैन् । धेरै सबुत प्रमाण जुटाउनुपर्ने भएका कारण समय लागेको हो । अहिले तथ्यहरू जुटाउने काम गरिरहेका छौँ । चाँडै अपराधी पत्ता लाग्छ ।’

उहाँले घटनास्थलबाट प्राप्त तथ्य र प्रमाणसँगै सामाजिक सञ्जालको पहुँच र कल रेकर्डहरूको अनुसन्धान पनि सुक्ष्म रुपले अगाडी बढिरहेको बताउनुभयो । भट्टको शव अझै अस्पतालमै छ ।