समायोजन खबर खोटाङ, खोटाङमा झण्डै पाँच महिनापछि जिल्लाभित्र सार्वजनिक यातायात सेवा सुरु भएको छ । अघिल्लो वर्षको चैत्र १० गतेबाट बन्द भएको यातायात सेवा साउन ८ गतेबाट सञ्चालनमा आएको हो । कोरोना महामारीबिचमा सरकारले जिल्लाभित्र मानव स्वास्थ्य सुरक्षाका मापदण्ड अपनाएर सार्वजनिक यातायातका साधन चलाउन निर्देशन गरेपछि कोरोना महामारीले थलिएका यातायात व्यवसायीहरुमा झिनो आशा पलाएको छ ।
यहि विषयमा रहेर समायोजनखबर डटकमले खोटाङ यातायात प्रालिका महासचिव रामकुमार हिङमाङसँग गरेको कुराकानीको संम्पादित अंश ।
कोरोना कहरपछि जिल्लाभित्र बस चल्न थालेको छ, कुन कुन स्थानमा बस चलिरहेको छ ?
आफ्नो जिल्लाभरी सामाजिक दुरी कायम गरी सार्वजनिक यातायात सेवा सुचारु गर्ने नेपाल सरकारको निर्णय अनुसार हामीले असार ८ गतेबाट बस सञ्चालन गरेका हौ । अहिले चाँहि दिक्तेल–निर्मलीडाँडा,दिक्तेल–दोर्पा बानाचुङ, दिक्तेल–बुईपा र दिक्तेल–जयरामघाटसम्म बस सञ्चालन गर्न थालेका हौ ।
समय तालिका चाँहि कस्तो छ नि ?
समय तालिका चाँहि बिहान ७ बजे दिक्तेलबाट निर्मलीडाँडा, २ बजे दिक्तेलबाट जयरामघाट, साढे २ बजे दिक्तेलबाट निर्मलीडाँडा, ४ बजे दिक्तेलबाट दोर्पा बानाचुङ, साढे ४ बजे दिक्तेलबाट बुईपाका लागि बस छुट्ने गरेको छ ।
स्वास्थ्य सुरक्षा कसरी अपनाउनु भएको छ ?
एउटा बसमा ३०/३२ जनाको सिट हुन्छ । त्यसमा हामीले आधा मात्रै यात्रु लगाउछौ । एउटा सिटमा दायाँबायाँ गरी दुई जना यात्रु बस्न मिल्छ त्यसमा चाँहि दुई जनाको सट्टामा एकजना यात्रु बसाल्ने गरेका छौ । सवै बसको सिट क्षमताभन्दा आधा मात्रै यात्रु लगाउने गरेका छौ । यात्रुहरु बसमा चढ्नु अघि उहाँहरुलाई स्यानिटाइजरको व्यवस्था गरेका छौ, मास्क लगाउनु भएको छ÷छैन हेर्छौ यदि मास्क लगाउनु भएको छैन भने सहयोग स्वरुप मास्क दिने, आगामी दिनमा लगाउन भनि सल्लाह दिने गरेका छौ । मास्क लगाउन अनुरोध गर्छौ ।
भाडा दर पक्कै बढेको होला नि ?
हजुर भाडादर एकदमै बढेको छ । यो चाँहि हामीले मात्रै बढाएको हैन । यो चाँहि नेपाल सरकारले नै कोरोना जोखिमलाई अलिकती न्युनिकरण गर्न अथवा महामारीबाट बच्नका लागि बसको एउटै सिटमा दुईजना यात्रु बस्न मिल्छ तर, त्यो सिटमा एकजना मात्रै यात्रु राख्ने र ५० प्रतिशत व्यवसायीहरुले, ५० प्रतिशत यात्रुले व्यहोर्ने गरेर ५० प्रतिशत भाडा बढेको छ । ५० प्रतिशत भाडा बढाइए पनि आधा मात्रै यात्रु बोक्ने नियमले यातायात व्यवसायीलाई भने घाटा नै छ ।
लामो दुरीका बस चलाउने कुरा चाँहि के छ ?
लामो दुरीको बस सञ्चालन गर्ने विषयमा यातायात व्यवसायीहरुको छाता संगठन नेपाल यातायात राष्ट्रिय महासंघ छ । उसले लामो दुरीको यातायात चाडोभन्दा चाडो सञ्चालन हुनुपर्छ र नागरिकहरुलाई अत्यन्तै समस्या प¥र्यो भनेर सम्बन्धित पक्षलाई ज्ञापनपत्र बुझाई रहेको छ । नेपाल सरकारले भदौ १ गतेबाट लामो दुरीको बस सञ्चालन गर्ने भनेर उद्घोष नै गरिसकेको छ ।हामीले चाँहि यात्रुहरुलाई समस्या भएको कुरालाई मध्यनजर राख्दै अझ चाँडो बनाउने कोशिसमा छौ ।
कोरोनाले धरासयी बनेका यातायात व्यवसायीहरु अब उठ्न कती लाग्ला ?
अहिले त आंकलन नै गर्न नसकिने स्थितीमा यातायत व्यवसायीहरु पुगेको छ । किनभने कोरोनाका कारणले गर्दा गाडीहरु चुस्तदुस्त चल्न सक्ने अवस्थामा छैन । गाडीको सम्पूर्ण पार्टपूर्जाहरुले काम गर्दैन । त्यसो हुनाले कतिपय व्यवसायीहरु त किस्ताको कारणले गर्दा, गाडीको समस्याले गर्दा, चालक सहचालकको समस्याले गर्दा पनि धेरै व्यवसायीहरु विस्थापित नै हुनुपर्ने अवस्था छ । तथापि पनि केही रहेका व्यवसायीहरु पहिलाकै ठाउँमा आउनलाई २/४ वर्ष चाँहि लाग्छ नै भन्ने हामीले आंकलन छौ ।२०७७ साउन १६ गते बिहान ९ :३८ मा प्रकाशित