समायोजन खबर खोटाङ,
हलेसी तुवाचुङ नगरपालिका–५ दुर्छिममा हलेसी थुमका प्रथम शासक होलेसुङ र उनका दश भाई छोराको सामुहिक चौतारो निर्माण गरिएको छ । दुर्छिमस्थित ऐतिहासिक हलेसीगढीमा किराती राजा होलेसुङ तथा उनका दश भाई छोराको इतिहासको सम्झना र सम्मानमा ‘होलेसुङ चौतारो’ निर्माण गरिएको हो ।

स्वदेश तथा विदेशमा रहेका २६ जना दाताबाट संकलन भएको ३ लाख ७० हजार ४५४ रुपैयाँमा निर्माण गरिएको साझा चौतारो शनिबार हलेसी तुवाचुङ नगरपालिकाका नगरप्रमुख इवन राईले उद्घाटन गरेका छन् । होलेसुङका जेठा छोरा होम्दिमहोँछा, माइला मायाराजाहोँछा, साइला जितराजाहोँछा, काइला पुरिमहोँछा, ठाइँला बिराजाहोँछा, अन्तरे फ्लोमोहोँछा, जन्तरे मुङ्लोहोँछा, मन्तरे नाम्राहोँछा, लखन्तरे सैंदोहोँछा र कान्छा तातेसुङहोँछाको नाम उल्लेखित चौतारो निर्माण गरिएको स्थानीय बुद्धिजिवी भूपेन्द्रकुमार राईले बताए ।

करिब ३५० वर्ष पहिले राज्यसत्ता सञ्चालन गरेका राजा होलेसुङ तथा उनका छोराहरुको स्मृतिमा शुभेच्छुकको सहयोगमा निर्माण गरिएको सामुहिक चौतारोको चारैतिर होलेसुङ र उनका दश भाईको प्रतिमा राखेर नाम उल्लेख गरिएको छ । हलेसी क्षेत्रमा पहिलोचोटी राजकीय जग बसाएका होलेसुङको नामबाट चिनिने हलेसीगढीको अस्तित्व र संरचनालाई संरक्षण गर्दै ऐतिहासिक महत्वलाई उजागर गर्नका लागि होलेसुङ समुहको पहलमा साझा चौतारो निर्माण गरिएको हो ।

होलेसुङपार्कका प्रारम्भिक काम, बगैंचा निर्माण लगायतका काम गरेपछि बाँकी रहेको रकमबाट होलेसुङ चौतारो निर्माण गरिएको राईले बताए । नेपाल भ्रमण वर्षलाई समेत लक्ष्यीत गरेर ऐतिहासिकगढीमा चौतारो उद्घाटन गरिएको हो ।  मध्यपहाडी लोकमार्गको जयराम–हलेसी सडक अन्तरगत दुर्छिमको छापडाँडा भन्दा केही माथि र रावाचुङगढी नजिकै रहेको हलेसीगढी पछिल्लो समय आन्तरिक पर्यटकको गन्तव्य एबं ऐतिहासिक अध्ययनको केन्द्रकारुपमा विकास हुँदै गएको छ । सल्लाघारीले ढाकेको हलेसीगढीले गोरखा दरबार, पाटन दरबार, कीर्तिपुर दरबारको जस्तै ऐतिहासिक महत्व बोके पनि प्रचार–प्रसारको अभावमा ओझेलमा परेको छ ।
२०७६ पुस ५ गते साँझ ५ :३९ मा प्रकाशित