चिसाङ शेर्पा खोटाङ,
दिप्रुङ चुईचुम्मा गाउँपालिका र दिक्तेल रुपाकोट मझुवागढी नगरपालिकाको सिमानामा पर्नेे साप्सु खोलामा पक्की पुल निर्माण हुने भएको छ । दिप्रुङ चुईचुम्मा गाउँपालिकाले केही समयअघि निर्माण गरेको सवैभन्दा छोटो दुरीको सडकको बिचमा पर्नेे साप्सु खोलाको ‘बाटो फेदी’ भन्ने स्थानमा पक्की पुल बन्ने भएको हो ।

स्थानीय सरकार बनेको तीन महिनामा ७ करोड ७८ लाखको डिपिआर तयार पारिएको पक्की पुल बनाउन प्रदेश सरकारले शशर्त अनुदानबाट १ करोड ३५ लाख बजेट बिनियोजन गरेकोे गाउँपालिका प्रमुख भुपेन्द्र राईले जानकारी दिए । गाउँपालिकाको वडा नम्बर १ याम्खा पुछार र नगरपालिकाको वडा नम्बर ४ खाल्लेको पुछारमा पर्ने साप्सु खोलामा ४० मिटर लम्बाईको पक्की निर्माण हुनेछ । पुल निर्माणका लागि बजेट बिनियोजन भईसकेकाले टेण्डरको कागजात बनाउन र टेण्डर आव्हानको प्रक्रियामा गाउँपालिका तीव्र रुपमा लागि परेको छ । टेण्डर प्रक्रियाको काम सकेर करीव तीन महिनापछि धमाधम पुल बनाउन सुरु गरिने जनाइएको छ । डिपिआरको डिजाईन स्टामेट अनुसार काम हुदै जाने र बजेट अपुग भएमा पुनः प्रदेश सरकार र गाउँपालिकाले व्यवस्थापन गरिने गाउँपालिकाले जनाएको छ ।

जिल्लाको दक्षिणी भेगका स्थानीयका लागि सदरमुकाम दिक्तेल आवतजावत गर्न सबैभन्दा छोटो दुरीको सडकमा पुल बनेपछि बाह्रै महिना यातायात सञ्चालन हुनेछ । हाल हिउँदमा पानी घटेको बेला मात्र सवारी साधन चल्ने गरेको छ । निर्वार्चित भएको तीन महिनामा पुलको डिपिआर गरेका थियौ । गाउँपालिका प्रमुख राईले भने, ‘अथक प्रयासपछि बल्ल डेढ वर्षमा टेण्डर आव्हानको प्रक्रियामा छिरेका छौ । वढीमा तीन महिना सवै काम सकेर पुलको भौतिक संरचना बन्न थाल्छ ।’ पुल बनेपछि गाउँपालिकाले बिकासमा फड्को मार्ने अपेक्षा गरिएको छ । सदरमुकाम दिक्तेल नजिक रहेको गाउँपालिका जानआउन छोटो दुरीको सडकमा पुल नहुंदा भनेजस्तो बिकास गर्न नसकिएको उहाँको भनाई छ । उक्त रुटमा पर्ने साप्खु खोलामा पक्की पुल नहुनु नै बिकासको बाधक बनेको छ ।
२०७५ मंसिर १० गते राती ९ः २७ मा प्रकाशित