चिसाङ शेर्पा खोटाङ,
खोटाङमा सातजना टुहुराटुहुरी वालवालिकालाई उपमेयरले आर्थिक सहयोग गरेकी छन् । हलेसी तुवाचुङ नगरपालिकाकी उपमेयर विमला राईले आमाबुवा दुवै गुमाएका सोही नगरपालिका–८ धितुङका टुहुराटुहुरी वालवालिकालाई २० हजार वढी आर्थिक सहयोग गरेकी हुन् ।

गत साउन १८ गते अचानक करेण्ट लागेर ज्यान गुमाएका बुबा चन्द्र किरात र गर्भपतन गराउने क्रममा २०७३ भदौ १९ गते आमा टलकुमारी राईको मृत्यु भएपछि बिचल्नीमा परेका टुहुराटुहुरी वालवालिकालाई आफुले राज्यवाट पाउने महिना दिनको सेवा सुविधा अन्तरगत २० हजार १ सय २० रुपैयाँ आर्थिक सहयोग गरेको उपमेयर राईले जानकारी दिईन् । उनले धितुङका वडाध्यक्ष पृथ्वीराज राईको रोहवरमा वालवालिकालाई आर्थिक सहयोग गरेकी हुन् ।

एकवर्ष अघि जिल्ला अस्पताल दिक्तेलमा गर्भपतन गराउने क्रममा चिकित्सकको लापारवाहीले आमाको ज्यान गएपछि बुवाको साहारमा बस्दै आएका २ छोरा ५ छोरीलाई बुवाले पनि छोडेर गएपछि वालवालिका बेसाहारा बनेका थिए । घरकी जेठी छोरी १६ वर्षीय बुङातुङ राईले आफ्ना भाईवहिनीहरुलाई पालनपोषण गरिरहेकी छन् । दशैको मुखमा सहयोग पाउदा टुहुराटुहुरी वालवालिका हर्षित भएका छन् ।

क्याप्सन :आमाबुवा गुमाएकी टुहुरी वालिकालाई रकम हस्तान्तरण गर्नुहुदै उपमेयर राई, तस्विर समायोजन खबर, २०७५ असोज २७ साँझ ६ : ३० मा प्रकाशित