समायोजन खबर खोटाङ, खोटाङमा एकैदिन करेन्ट लागेर दुईजना घाइते भएका छन्।

जेठ ३० गते ऐसेलुखर्क गाउँपालिका–५ महेश्वरीका अन्दाजी ५३ वर्षीय रामेश्वर राई र दिक्तेल रुपाकोट मझुवागढी नगरपालिका–६ नेर्पाका सन्तोष भुजेल घाईते भएका हुन्।

महेश्वरीस्थित आफ्नै घरमा विधुतको तार निकाल्ने क्रममा राईलाई साँढे १ वजे अचानक करेन्ट लागेको थियो। उनको प्राथमिक स्वास्थ्य केन्द्र ऐसेलुखर्कमा आफन्तको रोहवरमा उपचार भईरहेको प्रहरीले जनाएको छ। राईको अवस्था तत्काल बोल्न नसक्ने र गम्भीर रहेको प्रहरीले जनाएको छ।

अर्का घाइते भुजेललाई केपिलासगढी गाउँपालिका–५ सप्तेश्वर पोक्लुस्थित टेकमाइन्ड नेटवर्कको इन्टरनेट मर्मत गर्ने क्रममा अपरान्ह ३ वजे अचानक करेन्ट लागेको हो। नेटमा समस्या आएपछि भुजेल मर्मतका लागि सप्तेश्वर पुगेका थिए।

घाइते भुजेललाई गाडीमार्फत उपचारका लागि जिल्ला अस्पताल दिक्तेल ल्याइदै गरेको प्रहरीले जनाएको छ। उनको अवस्था बोल्न सक्ने र मध्यम रहेको छ।