समायोजन खबर खोटाङ, कर्तव्य ज्यान मुद्दाका फरार प्रतिवादी २३ वर्षपछि पक्राउ परेका छन्। पक्राउ पर्नेमा साविक बासपानी गाविस–७,हाल केपिलासगढी गाउँपालिका–३ बासपानीका ४१ वर्षीय सोमराज राई छन्।

असोज १६ गते सुनसरीको धरान उपमहानगरपालिका–११ धरानस्थित आफ्नै घरमा लुकिछिपी बसिरहेको भन्ने सूचनाको आधारमा सोमराजलाई पक्राउ गरिएको जिल्ला प्रहरी कार्यालय खोटाङका प्रहरी निरीक्षक एवंम् सूचना अधिकारी मोहन पोखरेलले जानकारी दिए।

पक्राउ परेका सोमराजलाई बिहीबार जिल्ला अदालत खोटाङमा पेश गराएर कैद भुक्तानका लागि सोही दिन जिल्ला कारागार पठाईएको प्रहरीले जनाएको छ।

पक्राउ परेका सोमराजले जाहेरवाला रामशंकर राईको १९ वर्षीय छोरा पूर्णबहादुर राईलाई २०५७ पुस १४ गते कर्तव्य गरी मारेका थिए। रामशंकरको जाहेरीका आधारमा जिल्ला अदालत खोटाङले २०५८ माघ २ गते सोमराजविरुद्ध कर्तव्य ज्यान मुद्दामा १० वर्ष कैद सुनाएको थियो। तर,उनी फरार थिए।