समायोजन खबर खोटाङ, खोटाङको साकेला गाउँपालिका–१ बाँझेच्यानडाँडास्थित डाँडागाउँमा आफ्नै भाईको खुकुरी प्रहारबाट दाई घाईते भएका छन्। शनिबार बिहान ११ः३० बजेको समयमा २० वर्षीय महेश राईको खुकुरी प्रहारबाट उनका दाई २६ वर्षीय चन्द्र कुमार राई घाईते भएका हुन्।

मादक पदार्थ सेवन गरी भाई महेशले दाई चन्द्र कुमारलाई धारिलो हतियार खुकुरी प्रहार गरी घाइते बनाएपछि साँझ ६ बजे उनलाई जिल्ला अस्पताल दिक्तेलमा उपचारमा ल्याईएको थियो।

घट्नाका सम्बन्धमा अस्पतालमा खटिएको प्रहरीमाफर्त जिल्ला प्रहरी कार्यालयमा जानकारी हुनसाथ प्रहरी चौकी रतन्छाबाट प्रहरी सहायक निरीक्षक विष्णु विकको कमाण्डमा प्रहरी टोली घट्नास्थलमा खटेका छन् । घाईतेको अवस्था बोल्न सक्ने रहेको छ।

उता, ऐसेलुखर्क गाउँपालिका–३ ऐसेलुखर्क लालबौद्धका ५५ वर्षीय गणेश तामाङ रोटेपिङबाट लडेर घाइते भएका छन्। शनिबार अपरान्ह ५ः३० बजे बढारेमा लगाईएको रोटेपिङ खेल्ने क्रममा लडि घाईते भएका हुन्।

पिङबाट लडेका तामाङको तत्काल हातखुट्टा नचलेको, बायाँ खुट्टामा चोट लागेको र उनको अवस्था बोल्न सक्ने रहेको प्रहरीले जनाएको छ। उनको प्राथमिक स्वास्थ्य केन्द्र ऐसेलुखर्कमा उपचार भईरहेको छ।