समायोजन खबर खोटाङ, खोटाङको हलेसीबाट भक्तपुर जाँदै गरेको नम्बर नखुलेको हाइलक्स गाडी सिन्धुलीको गोलान्जोर गाउँपालिका १ कुडुलेस्थित सुनकोशी नदीमा खस्दा गाडीमा सवार चारमध्ये तीनजना बेपत्ता भएका छन्।
शनिबार अपरान्ह ५:३० बजे गाडी आफै अनियन्त्रित भई सुनकोशी नदीमा खस्दा गाडीमा सवार भक्तपुर सुर्यविनायक नगरपालिका जगातीका २७ वर्षीय सुशान्त कक्षपति प्रहरी सम्पर्कमा आएका छन्। उनको पाता, कुहिने र टाउकोमा चोट लागेको छ। उनलाई उपचारमा खुर्कोटतर्फ पठाईएको छ।

बेपत्ता हुनेमा भक्तपुर सुर्यविनायक नगरपालिका जगातीका ३२ वर्षीय चालक अबिन बाके, गाडीमा सवार सोही ठाउँका ३० वर्षीय प्रनित स्यागु र त्यही ठाउँका ३७ वर्षीय बलराम घटुवा रहेका छन्।

बेपत्ताहरुको प्रहरी चौकी ग्वालटारबाट प्रहरी सहायक निरीक्षकको कमाण्डमा खटेको ४ जना, जिल्ला प्रहरी कार्यालय सिन्धुलीबाट प्रहरी नायब उपरीक्षकको कमाण्डमा खटेको १३ जना र सशस्त्र प्रहरी निरीक्षकको कमाण्डमा खटेको १० जनाले खोजी गरिरहेको प्रहरी चौकी ग्वालटारले जनाएको छ।