समायोजन खबर खोटाङ, पाल्पाको तिनाउ गाउँपालिका–६, मस्यामको चिदिसमा जिप दुर्घटना भएको छ। सिद्धार्थ राजमार्गको डुम्रेबाट चिदिस जाँदै गरेको लु १ ज २३७१ नम्बरको जिप मंगलबार चिदिसमा दुर्घटना भएको हो।

दुर्घटनामा ८ जनाको घटनास्थलमै मृत्यु भएको जिल्ला प्रहरी कार्यालयका प्रमुख हेरम्वर शर्माले जानकारी दिनुभयो। अझै मृतकको पहिचान हुन सकेको छैन। घटनामा घाइते हुनेको संख्या १८ पुगेको छ।

घाइतेहरुको अहिले लुम्बिनी मेडिकल कलेज प्रभासमा उपचार भइरहेको छ। घाइते मध्ये एक जनाको अवस्था गम्भीर रहेको एसपी शर्माले बताउनुभयो। प्रहरी र स्थानीयको सहयोगमा घाइतेहरुको उद्दार गरिएको हो।

उकालोमा ब्याक गर्ने क्रममा जिप दुर्घटना भएको प्रहरीको प्रारम्भीक अनुमान रहेको छ। घटनाको विषयमा थप अनुसन्धान भइरहेको प्रहरीले जनाएको छ।