समायोजन खबर खोटाङ, बिगत पाँच दिनदेखि वेपत्ता दिक्तेल रुपाकोट मझुवागढी नगरपालिका–१५ विजयखर्क बसेरीकी जैसीमाया ढुंगाना खोज्न प्रहरीले तालिमप्राप्त कुकुर परिचालन गरेको छ।

प्रदेश प्रहरी कार्यालयबाट कुकुर (पुलिस डग) ल्याएर जिल्ला प्रहरी कार्यालय खोटाङका प्रमुख (डिएसपी) पुरुषोत्तम खड्कासहितको प्रहरी टोली (आज) शनिबार दिउसो घटनास्थल पुगेको हो।

प्रमुख जिल्ला अधिकारी सन्त बहादुर सुनार पनि घटनस्थल निरिक्षणका लागि पुग्नु भएको जिल्ला प्रहरी कार्यालय खोटाङका सूचना अधिकारी प्रहरी निरीक्षक बेनु कुमार कार्कीले जानकारी दिए।

विजया दशमीको दिन आफन्तकामा टीका लगाएर घर फर्किनेक्रममा वृद्धा ढुंगाना हराएको परिवार स्रोतले जनाएको छ। श्रीमानसँगै घर फर्किएकी वृद्धा घर नजिकै बाटोमा हराएको परिवारको भनाइ छ।
बाटोमा श्रीमानभन्दा केही पछि रहेकी वृद्धा ढुंगाना घर नआएकाले खोजतलासका लागि परिवारले प्रहरीमा निवेदन दिएका थिए। वृद्धा हराएको खबर पाउनसाथ खोजतलास सुरु गरेको प्रहरीले चार दिनसम्म फेला नपरेपछि कुकुर ल्याएर थप खोजी कार्य भइरहेको प्रहरीको भनाइ छ ।
वृद्धा हराएको स्थलमा यतिबेला कुकुर परिचालन गरि वृद्धाको खोजी भईरहेको स्थानीय किसन भुजेलले बताएका छन्।