समायोजन खबर खोटाङ,खोटाङको ऐसेलुखर्क गाउँपालिकाले गाउँपालिकाको नाम राखेर अनाधिकृत रुपमा खोलिएका विभिन्न फेसबुक पेज र ग्रुपहरु तत्काल डिलिट गर्न आग्रह गरेको छ।

गाउँपालिकाको आधिकारिक फेसबुक पेज(ऐसेलुखर्क गाउँकार्यपालिकाको कार्यालय) बाहेक अन्य व्यक्तिहरुबाट गाउँपालिकाको नाममा फेसबुक पेज र ग्रुपहरु खोलिएको पाईएकाले ति पेज र ग्रुपहरु तत्काल डिलिट गर्न बिहीबार सूचना जारी गरेर आग्रह गरेको हो।
गाउँपालिकाको नाम राखेर खोलिएका फेसबुक पेज तथा ग्रुपहरुबाट अनाधिकृत सूचना र अश्लिल किसिमका पोष्टहरु सार्वजनिक गर्ने गरेको जानकारी आएकाले त्यस्ता पेज र ग्रुपहरु तत्काल डिलिट गर्न सरोकारवाला सबैलाई आग्रह गरिएको ऐसेलुखर्क गाउँपालिका अध्यक्ष गीरेन्द्र बहादुर राईले बताउनुभयो।

राईका अनुसार गाउँपालिकाको आग्रहलाई बेवास्ता गरी अब त्यस्ता पेज र ग्रुपहरुबाट कुनै पनि किसिमको सूचना पोष्ट गरेमा प्रचलित कानुन बमोजिम कडा कारवाही अगाडी बढाइनेछ।‘गाउँपालिकाको नाम गरेर खोलेको फेसबुक पेज र ग्रुपमा कतिपयले अश्लिल फोटो समेत हालेको पाईयो। त्यस्ता सामाग्री म समक्ष आईपुगेको छ। अब हामी यस्ता अराजक र अनैतिक काम गर्ने विरुद्ध कानुनी रुपमा अघि बढ्छौ।’ अध्यक्ष राईले भन्नुभयो।

जिल्लाको दुई नगरपालिका र आठ गाउँपालिकाले नागरिकलाई सूचना प्रवाहमा सहजताका लागि आधिकारिक फेसबुक तथा फेसबुक पेज सञ्चालन गरिरहेका छन्। अन्य स्थानीय तहको नामगरी अनाधिकृत फेसबुक पेज तथा ग्रुपहरु पनि सञ्चालन भईरहेको पाईएको छ।