समायोजन खबर खोटाङ, प्रहरीको कुटाईबाट खोटाङमा एक किशोर घाईते भएका छन्। दिप्रुङ चुईचुम्मा गाउँपालिका–१ याम्खास्थित प्रहरीचौकीमा कार्यरत प्रहरी जवान सागर राईको कुटपिटबाट सोही ठाउँका १४ वर्षीय अशोक दाहाल घाईते भएका हुन्।

सामान्य विषयमा विवाद हुँदा राई र दाहालबीच सोमबार हात हालाहाल भएको थियो। दाहालले हात हालेपछि प्रहरी जवान राईले कुटपिट गरेको प्रत्यक्षदर्शीले बताएका छन्। आफुमाथि कुटपिट भएको भन्दै दाहाल पुःन हतियारसहित प्रहरीमाथि जाइलागेपछि उनीमाथि थप कुटपिट भएको थियो। दाहालमाथि प्रहरी हवल्दार प्रभुराम बास्तोलाले पनि कुटपिट गरेको आमा मुना दाहालले दावी गरिन्।

केही समयअघि एपेन्डिसाइटको अप्रेसन गरेका दाहालको निरन्तर पेट दुखेपछि एम्बूलेन्समार्फत जिल्ला अस्पताल दिक्तेल लगिएको छ। कुटपिटमा संलग्न प्रहरी जवान राईलाई छानविनका लागि जिल्ला प्रहरी कार्यालयमा तानिएको डिएसपी मञ्जिल मुकारुङले बताए।

कुटपिटको घट्नापछि मिलापत्र गराउने प्रयास गर्दा दाहाल परिवारले अस्वीकार गरेको वडाध्यक्ष केशव खत्रीले बताए।