समायोजन खबर खोटाङ, खोटाङको केपिलासगढी गाउँपालिकाले वर्षको ‘उत्कृष्ट स्वंयमसेविका पुरस्कार’ नरमाया गुरुङलाई प्रदान गरेको छ। गाउँपालिकाको वडा नं. ४ बाक्सिला स्वास्थ्य चौकी मातहतमा रही सेवा दिंदै आएकी गुरुङलाई बिहीबार पुरस्कार प्रदान गरिएको हो।

गाउँपालिकामा कार्यक्रमको आयोजना गरी गुरुङलाई गाउँपालिका अध्यक्ष समिर राई र गाउँपालिकाका प्रमुख प्रशासकीय अधिकृत अजम्बर राईले नगद १५ हजार प्रदान गरेका छन्।

आर्थिक वर्ष २०७८/०७९ मा समुदाय स्तरमा रहेर समाजलाई स्वास्थ्य क्षेत्रमा पु¥याएको अतुलनीय योगदानको उच्च कदर गर्दै गुरुङलाई सम्मान गरिएको गाउँपालिकाले जनाएको छ।

गाउँपालिका भित्रका ७५ जना महिला स्वास्थ्य स्वंयमसेविकाहरुबाट कार्यशैली र कार्य क्षमताको आधारमा गुरुङलाई वर्षको उत्कृष्ट स्वंयमसेविका छनोट गरिएको हो। गाउँपालिकाको स्वास्थ्य शाखाको ब्यबस्थापनमा जिल्ला स्वास्थ्य कार्यालयको वार्षिक कार्यक्रम अन्तर्गत उनलाई पुरस्कृत गरिएको जनाईएको छ।