समायोजन खबर खोटाङ,नेपाल पत्रकार महासंघ जिल्ला शाखा खोटाङले पत्रकारको हितमा आपतकालीन सहायता कोष स्थापना गर्ने निर्णय गरेको छ। विभिन्न समस्यामा परेका पत्रकारको सहयोगार्थ १० लाख बराबरको कोष बनाउने लक्ष्यका साथ आपतकालीन सहायता कोष स्थापना गर्ने निर्णय गरेको हो।

महासंघको कार्यालयमा आइतबार बसेको बैठकले पत्रकार महासंघको साधारण सदस्य रहेर पत्रकारिताका क्षेत्रमा क्रियाशील रहेको अवस्थामा कुनै दुर्घटनामा गम्भीर भई अस्पताल लैजानु परेमा, अंगभंग भएमा वा जटिल किसिमको रोगको उपचार गर्नु परेमा, दुर्घटनाका कारण निजको मृत्यु भएमा, बाढीपहिरोले घरमा क्षति पुगेमा आर्थिक सहयोग गर्नेगरी कोष स्थापना गर्ने निर्णय गरिएको नेपाल पत्रकार महासंघ शाखाका अध्यक्ष दिलीप खत्रीले बताए।

पत्रकार आपतकालीन सहायता कोष स्थापनाका लागि सञ्चार उद्यमी, निजी क्षेत्र, सामाजिक व्यक्तित्व, निर्माण व्यवसायी र स्थानीय सरकारसँग सहयोगको अपिल गरिने छ। बैठकले कोष स्थापना गर्ने अभियानका लागि महासंघका अध्यक्ष खत्री र सहसचिव चिसाङ शेर्पालाई जिम्मेवारी दिएको छ।

यसैबीच, पत्रकार आपतकालीन सहायता कोष स्थापना गर्ने निर्णय भए लगत्तै हलेसी न्युज नेटवर्क प्रालिका अध्यक्ष तथा प्रेस चौतारी नेपालका केन्द्रीय सदस्य पत्रकार हरिबोल आचार्यले नगद पाँच हजार सहयोग गरेका छन्। यस अभियानमा हातेमालो गर्न पत्रकार आचार्यले सबैलाई आग्रह गरेका छन्।