समायोजन खबर खोटाङ, खोटाङमा दुई महिनामा २४ वटा सामुदायिक वनमा डढेलो लागेको छ। सुख्खा र हावाहुरीको मौसम सुरु भएपछि जिल्लाको विभिन्न स्थानमा रहेका सामुदायिक वनहरुमा डढेलो लागेको हो।

११ फागुनदेखी १६ चैतसम्म २४ वटा सामुदायिक वनमा डढेलो लाग्दा ३ घर जलेर नष्ट भएको, चार सय मिटर खानेपानी पाइप डढेको र केपिलासगढी गाउँपालिकाको बासपानीका पदम खड्काको घर, मतान, गोठसहित ३० मुरी धान, ७ मुरी मकै जलेर नष्ट भएको डिभिजन वन कार्यालय खोटाङले जानकारी दिएको छ।

वन कार्यालयका अनुसार विजयखर्कको जुरेथुम्का सामुदायिक वन, सागुरी सामुदायिक वन पुर्व/पश्चिम, लफ्याङको चालीसे सामुदायिक वन, खाल्लेको भाला सिरुवानी सामुदायिक वन, बुईपाको रातामाटा चउर लुमे सामुदायिक वन, राजापानीको महमकला सामुदायिक वन, भालढुंगा सामुदायिक वन, धितुङको सल्लेरी तारेभिर सामुदायिक वन, जलेश्वरीको किमसरा जुकेपानी सामुदायिक वन, राखाबाङदेलको लिविङखोला सामुदायिक वन, बाकाचोलको ढुंगेखर्क सामुदायिक वन र कात्तिके देविस्थान सामुदायिक वनमा डढेलो लागेको छ।

हौंचुरको लोचा लमजुङ सामुदायिक वन, खार्ताम्छाको रमितपाखा सामुदायिक वन, बासपानीको रानी सामुदायिक वन, दिप्सुङको दिन्दुडाँडा सामुदायिक वन र पात्ले सामुदायिक वनमा डढेलो लागेको कार्यलयसँग तथ्यांक छ। कात्तिके सामुदायिक वन, लोचा लमजुङ सामुदायिक वन, लिविङखोला सामुदायिक वन, ढुंगेखर्क सामुदायिक वनमा फरक–फरक समयमा डढेलो लागेको छ।

डढेलोबाट रुख विरुवा, भुई घाँस, निगालो, रुखका लाथ्रा, जीवजन्तु, जडीबुटी, जलेर नष्ट भएको छ । डिभिजन वन कार्यालयका प्रमुख धनन्जय लामिछानेले खडेरी मौसम, घाँस पलाउन भन्दै डढेलो लगाउने, जग्गा मलिलो हुने भनेर पात पतिङगर पोलेर त्यतिकै छोड्ने र सामुदायिक वन उपभोक्ता समिति निष्कृय हुँदा डढेलो लाग्ने गरेको बताए।

सामुदायिक वन उपभोक्ता समितिले वनबाट लाखौ फाईदा लिने तर, सचेतनाका कार्यक्रम र प्रचारप्रसार नगर्दा डढेलो लागिरहेको पाईन्छ । प्रमुख लामिछानेले भने, ‘सामुदायिक वन उपभोक्ता समितिले सामान्यतः अग्नी रेखा समेत नबनाउनाले डढेलो लाग्ने गरेको छ ।’ जिल्लामा करीव ३ सय बढि सामुदायिक वनहरु रहेको छ।