समायोजन खबर खोटाङ, खोटाङको हलेसी तुवाचुङ नगरपालिकालाई आधारभूमि बनाएर प्रकाशन भईरहेको तुवाचुङ साप्ताहिक पत्रिकाले दोश्रो वार्षिक उत्सवको अवसरमा सातजना पत्रकारलाई पुरस्कृत गरेको छ । बुधबार हलेसीस्थित होटल भिलेजमा दोश्रो वार्षिक उत्सव मनाउँदै साप्ताहिकले सातजना पत्रकार र एकजना युवा उद्यमीलाई पुरस्कृत गरेको हो ।

पुरस्कृत हुनेमा पत्रकार चिसाङ शेर्पा, रामधन राई, सुर्य तामाङ, दीपक राई, नवीन चाम्लिङ राई, असल चरित्र, शिवकुमार राई रहेका छन् । पत्रकारलाई जनही १५ हजार नगदका साथमा प्रमाणपत्र प्रदान गरेर सम्मान गरिएको तुवाचुङ साप्ताहिकका प्रकाशक/सम्पादक दीपेन्द्र राईले जानकारी दिए ।

पत्रकार शेर्पा र शिवकुमारलाई स्वर्गीय सिजन राई तुवाचुङ साप्ताहिक पत्रकारिता पुरस्कार, रामधनलाई स्वर्गीय इन्द्रसेर राई/गउनसरी राई तुवाचुङ पत्रकारिता पुरस्कार, सुर्यलाई स्वर्गीय मेघराज राई तुवाचुङ साप्ताहिक पत्रकारिता पुरस्कार, नविनलाई तुवाचुङ मारतिका यातायात प्रालि तुवाचुङ साप्ताहिक साहसिक पत्रकारिता पुरस्कार तथा दीपक र असललाई रुनिशा राई तुवाचुङ साप्ताहिक पत्रकारिता पुरस्कारवाट पुरस्कृत गरिएको हो ।यस्तै, स्वर्गीय कृष्णध्वज राई तुवाचुङ साप्ताहिक युवा उद्यमी पुरस्कारवाट दिक्तेल रूपाकोट मझुवागढी नगरपालिका–१४ बुईपाका चाम्लिङ तृष्णा ऋण तथा बचत सहकारी लिमिटेडका अध्यक्ष ईन्द्र चाम्लिङलाई पुरस्कृत गरिएको छ । पुरस्कार राशी १५ हजार रहेको छ ।

पुरस्कृत पत्रकार तथा उद्यमीलाई वार्षिक उत्सव कार्यक्रमका प्रमुख अतिथि तथा हलेसी तुवाचुङ नगरपाकिाका नगरप्रमुख इवन राईले पुरस्कार र प्रमाणपत्र प्रदान गरेका थिए । साप्ताहिकले प्रत्येक वर्षको साउन ४ गते वार्षिक उत्सव मनाउदै आएको थियो । तर, यसपटक कोभिडका कारण चैतमा वार्षिक उत्सव मनाउनु परेको साप्ताहिकका प्रकाशक/सम्पादक राईले बताए ।वार्षिक उत्सवको अवसरमै पुरस्कार स्थापनार्थ गरिदिनुहुने राजनीतिकर्मी समीर राई, डिल्ली चाम्लिङ, समाजसेवी पदमकुमार राई, विधार्थी रुनिशा राई, तुवाचुङ मारतिका यातायात प्रालिलाई सम्मान गरिएको छ । गतवर्ष तुवाचुङ साप्ताहिकले पहिलो वार्षिक उत्सवमा पत्रकार दमन राई, केदार मगर, उत्तम चौलागाँई, समाजसेवी जनकराज राई, साहित्यकार विक्रम चेतनशील राई र कराते खेलाडी शेशुका राईलाई पुरस्कृत गरेको थियो ।