समायोजन खबर खोटाङ, खोटाङको हलेसी तुवाचुङ नगरपालिका–८ धितुङलाई उज्यालो वडा घोषणा गरिएको छ । वडावासी सम्पूर्ण नागरिकहरुको घर–घरमा केन्द्रीय प्रसारण लाईनको विजुली बत्ती बलेपछि उज्यालो वडा घोषणा गरिएको हो ।

हलेसी तुवाचुङ नगरपालिकाको उज्यालो वडा अभियान अन्तर्गत मंगलबार धितुङको बखुवामा कार्यक्रमको आयोजना गरी नगरप्रमुख इवन राई र उपप्रमुख विमला राईले बत्तीको स्वीच अन गरेर धितुङलाई उज्यालो वडा घोषणा गरेका हुन् ।नगरपालिकाको आर्थिक सहयोग र नेपाल विधुत प्राधिकरण दिक्तेल वितरण केन्द्रको प्राविधिक सहयोगमा उज्यालो वडा बनाइएको हो । वडाको करीव छ सय घरधुरीमा वर्षौ वर्षपछि केन्द्रीय प्रसारण लाइनको वत्ती बलेपछि स्थानीयहरु हर्षित भएका छन् ।

२४ सैं घण्टा वत्ती वलेपछि लेखपढ गर्न, कुटानी पिसानी गर्न, इमेल इन्टरनेट चलाउन, कम्प्युटर टेलिभिजन चलाउन सहज हुने स्थानीयहरुको भनाई छ । वर्षौवर्ष अध्यारोमा बस्दै आएका धितुङवासीले जनप्रतिनिधि आएपछि उज्यालो पाएका हुन् ।

नगरपालिकाले दुई महिनापछि दुर्छिम र च्यास्मिटारलाई उज्यालो वडा घोषणा गर्दैछ । डिकुवा र बाहनीडाँडामा विधुत विस्तारको काम युद्धस्तरमा भइरहेको नगरप्रमुख राईले बताए । अन्य वडाहरुलाई यसअघि नै उज्यालो वडा घोषणा गरिसकिएको छ । यो नगरपालिकामा ११ वडा छन् ।