चिसाङ शेर्पा खोटाङ, खोटाङको खार्मी र सप्तेश्वरको सिमानामा अवस्थित तापखोलामा निर्माणाधिन पक्की पुलको काम अन्तिम चरणमा पुगेको छ । केपिलासगढी गाउँपालिका–५ सप्तेश्वर र दिक्तेल रुपाकोट मझुवागढी नगरपालिका–११ खार्मीको सिमाना तापखोलामा निर्माणाधिन पुलको काम अन्तिम चरणमा पुगेको हो ।

पुलको काम ९५ प्रतिशत सकिएको निर्माण कम्पनी सुर्य कन्ट्रक्सन प्रालिका सव–कन्ट्राक्टर सुनिल राईले जानकारी दिए । राईका अनुसार अब स्ल्याप ढलान र फुटपातको काम मात्रै बाँकी छ । स्ल्याप ढलानका लागि फर्माको काम सकेर ढलान गर्ने तयारीमा रहेको उनको भनाई छ ।

धेरै अगाडी सकिने पुलको काम कोभिड असरले केही पर स¥र्यो । सव–कन्ट्राक्टर राईले भने, ‘नत्र भने दुई वर्षमा सकिनुपर्ने पुलको काम वर्ष दिनमै सक्ने थियौ ।’ दुई वर्षमा सम्पन्न गर्नेगरी २०७५ फागुन १ गते गाउँपालिका र निर्माण कम्पनीविच सम्झौता भएर २०७६ सालको बैशाखबाट पुलको काम सुुरु भएको थियो ।

सम्झौता अनुसार पुलको काम २०७८ सालको बैशाखमा सकिनुपर्ने थियो । तर, निर्माण कम्पनीले सम्झौता अवधि भन्दा अगाडी नै पुलको काम सम्पन्न गर्न लागेको हो । निर्माण कम्पनीहरुले काम जिम्मा लिएर सम्झौता समयमा काम नसकी लथालिंग बनाइरहंदा सुर्य कन्ट्रक्सन प्रालिले भने दुई वर्षको काम करीव १८ महिनामा सम्पन्न गर्न लागेको हो ।

पुल नहुंदा यातायातको समस्या झेल्दै आएका गाउँपालिकाबासीको समस्यालाई ध्यानमा राखी गाउँपालिकाले ३ करोड ८३ लाख २६ हजार ९५९ रुपैयाँ बजेट खर्चेर पुल निर्माण गरिरहेको हो । निर्माण कम्पनीले पुलको काम अन्तिम चरणमा पु¥र्याएको केपिलासगढी गाउँपालिका अध्यक्ष कृष्णकुमार राईले बताए । तापखोलामा पुल बनिसकेपछि गाउँपालिकाबाट दिक्तेल, तराई र काठमाण्डौ जानआउन सहज हुनेछ।

पुल नहुंदा बर्षायाममा यातायात सेवा बन्द हुंदै आएको छ । पुलकै कारण वर्षायाममा गाउँपालिकाभरी नियमित उपभोग्य वस्तुको ६/७ रुपैयाँले मुल्य बढ्ने गरेको छ । अध्यक्ष राईले भने, ‘पुल बनेपछि करीव गाउँपालिकाका १४ हजार जनसंख्यालाई आवतजावत गर्न सहज हुनेछ ।’