समायोजन खबर खोटाङ, सेवाग्राहीबाट घुस लिईरहेको अवस्थमा जलश्रोत तथा सिंचाई विकास डिभिजन कार्यालय दिक्तेल खोटाङका प्रमुख नारायणकाजी श्रेष्ठलाई अख्तियार दुरुपयोग अनुसन्धान आयोगको टोलीले घुस सहित पक्राउ गरेको छ । सेवाग्राहीबाट ९ लाख ३४ हजार घुस लिइरहेको अवस्थामा कार्यालय प्रमुख श्रेष्ठलाई मंगलबार अख्तियार दुरुपयोग अनुसन्धान आयोगको टोलीले रंगे हात पक्राउ गरेको हो । अख्तियारको टोलीले श्रेष्ठलाई घुस रकम सहित कार्यालयबाटै पक्राउ गरेको हो ।

श्रेष्ठको साथबाट श्रोत नखुलेको ९९ हजार ५ सय रुपैयाँ पनि जफत गरिएको अख्तियारको टोलीले बताएको छ । हाल जलश्रोत तथा सिंचाई विकास डिभिजन कार्यालय आसपासमा सिल गरेर कसैलाई पनि प्रवेश दिइएको छैन ।
बरामद गरेको रकम र पक्राउ परेका श्रेष्ठको स्वास्थ्य परिक्षण गरी अख्तियार दुरुपयोग अनुसन्धान आयोगको कार्यालय काठमाण्डौ लगिने अख्तियार दुरुपयोग अनुसन्धान आयोगका प्रवक्ता प्रदीपकुमार कोइरालाले समायोजन खबरलाई जानकारी दिनुभयो ।
प्रमुख श्रेष्ठले सिँचाई योजनाको रकम प्रदेशबाट निकासा हुन ढिलाइ भइरहेको अवस्थामा अधिकांशसँग ‘छिटो निकासाका लागि माथि रकम दिनुपर्ने’ भन्दै पटक–पटक बार्गेनिङ गर्दैआएको सेवाग्राहीको गुनासो छ । यसअघि पनि सिंचाईका प्राविधिक तथा कर्मचारीहरुले सेवाग्राहीलाई काममा अनावश्यक झुलाउने र पैसामा बार्गेनिङ गर्ने गरेको खुलासा भएको छ ।२०७७ असार ३० गते दिउँसो २ : ३४ मा प्रकाशित