समायोजन खबर सोलुखुम्बु, एक जनामा कोरोना सङ्क्रमण पुष्टि भएपछि सङ्क्रमितको घर र  जिल्ला अस्पताल सिल गरिएको छ । सोलुदुधकुण्ड नगरपालिकाका २७ वर्षीय युवामा कोरोना पुष्टि भएसँगै बिहीबार बसेको कोभिड जिल्ला संकट व्यवस्थापन केन्द्र (डिसीएमसी) को बैठकले सिल गर्ने निर्णय गरेको हो ।

निमोनिया र श्वासप्रस्वासको लक्षण देखिएर जिल्ला अस्पताल फाप्लुमा भर्ना भएका युवामा सङ्क्रमण पुष्टि भएपछि अन्यमा सङ्क्रमण फैलिन नदिन यस्तो निर्णय गरिएको सहायक प्रमुख जिल्ला अधिकारी लक्ष्मी कुमारी शाहीले जानकारी दिनुभयो । उहाँका अनुसार सङ्क्रमितको उपचारमा संलग्न स्वास्थ्यकर्मीहरुलाई क्वरेन्टीनमा राखिएको छ ।

युवाको परिवार र उपचारमा संलग्न चिकित्सकहरुको पीसीआर परिक्षण गरिने तयारी भइहेकाले उनीहरुको रिपोर्ट नआएसम्म सिल गरिएको जिल्ला प्रशासन कार्यालय सोलुखुम्बुले जनाएको छ ।२०७७ जेठ १६ गते दिउँसो १ :४६ मा प्रकाशित