समायोजन खबर खोटाङ, खोटाङको दिक्तेल रुपाकोट मझुवागढी नगरपालिका वडा नम्बर–८ दोर्पाचिउरीडाँडाका एक यूवा मृत फेला परेका छन् । १४ चैत साँझ घर नजिकैको एक पसलमा झगडा भएपछि झगडास्थलबाट हराएका २१ वर्षीय भाइके भनिने डिल्लीकुमार राई बुधबार मृत फेला परेका हुन् ।

पसलमा झगडा भएपछि रिसको आवेगमा झगडास्थलबाट उनी हिडेपछि खोजीकार्य गर्नेक्रममा घर नजिकैको एक खोल्सीमा मृत अवस्थामा भेटिएको जिल्ला प्रहरी कार्यालय खोटाङका प्रहरी निरीक्षक आमोदकुमार खेरवारले जानकारी दिए । हराएका भाइकेलाई झण्डै एक हप्तापछि बुधबार घाँसदाउरा काट्न गएका स्थानीयले मृत फेला पारेका खेरवारले जानकारी दिए ।
पसलमा रहेका र झगडामा संलग्न नौ जनालाई बुधबार नै नियन्त्रणमा लिएर आवश्यक अनुसन्धान सुरु गरिएको खेरवारको भनाई छ । २०७६ चैत २० गते बिहान १०: १२ मा प्रकाशित