चिसाङ शेर्पा खोटाङ,
खोटाङमा जुवातास खेलिरहेको अवस्थामा नौ जना व्यक्तिलाई प्रहरीले नियन्त्रणमा लिएको छ । हलेसी तुवाचुङ नगरपालिका–७ महादेवस्थानस्थित  महालङगुर होटलमा जुवातास खेलिरहेको अवस्थामा बुधबार राती ९ वजे उनीहरुलाई नियन्त्रणमा लिएको हो ।

पैसाको हारजित हुनेगरी जुवातास खेलिरहेको गोप्य सूचनाको आधारमा जुवातास खेल्ने व्यक्तिलाई नियन्त्रण र उनीहरुको साथबाट ७४ हजार १ सय १० रुपैयाँ नगद जफत गरिएको जिल्ला प्रहरी कार्यालय खोटाङका प्रहरी नायव उपरिक्षक बामदेव गौतमले बताए ।

व्यवसायिकरुपमै होटलमा जुवातास खेलिरहेको गोप्य सूचनाका आधारमा ईलाका प्रहरी कार्यालय हलेसीको टोलीले छापा मारेर उनीहरुलाई नियन्त्रणमा लिएको हो । पक्राउ परेका उनीहरुलाई जिल्ला प्रहरी कार्यालयमा ल्याएर कानुनी प्रक्रिया पूरा गरी आवश्यक अनुसन्धान भईरहेको प्रनाउ गौतमले बताए । नियन्त्रणमा लिएकाहरुको नाम भने प्रहरीले दिन मानेन् ।

पक्राउ परेकाहरुलाई कानुन वमोजिम कारवाही हुने र अहिले पनि अनुसन्धानकै क्रम रहेको प्रमुख जिल्ला अधिकारी शालिग्राम शर्मा पौडेलले बताए । पक्राउ परेकाको नाम आफूसमक्ष प्राप्त नभएको प्रजिअ पौडेलको भनाई छ ।
२०७६ चैत्र ६ गते मध्यान्ह १२ : ५७ मा प्रकाशित