चिसाङ शेर्पा खोटाङ,
आन्तरिक तथा वाह्य पर्यटक तान्नलाई हलेसी तुवाचुङ नगरपालिकाले ढुङ्गे बगैचा (रक गार्डेन) निर्माण गर्ने भएको छ । नगरपालिकाको वडा नम्बर–७ महादेवस्थानको ककनीडाँडामा रहेका विभिन्न आकृतीका कलात्मक हजारौं ढुंगाहरु भएको ठाउँलाई ‘ढुङ्गे बगैचा’ बनाउन लागेको हो ।

त्रि–धार्मिकस्थल हलेसीबाट केही माथि रहेको रमणीय डाँडामा महादेवलाई भस्मासुरले लखेटेको साथै उनीहरूबीच भीषण युद्ध भएको किंवदन्ती छ । भस्मासुरले महादेवलाई लखेट्दा महादेवको पाइला परेको स्थानमा कलात्मक ढुङ्गाहरू पैदा भएको भनिन्छ । यस क्षेत्रमा अन्य निर्माणका काम गरेर कलात्मक इतिहास बोकेको ढुङ्गा नष्ट गर्नुभन्दा ढुङ्गे बगैचाका रूपमा विकास गर्न लागिएको हलेसी तुवाचुङ नगरपालिकाका नगरप्रमुख इवन राईले बताए । ढुङ्गे बगैचा निर्माणका लागि डिपिआरको काम अन्तिम चरणमा पुगेको राईले बताए ।

ढुङ्गे बगैचामा ढुङ्गालाई नबिगारी त्यसैलाई सजिसजाउ गरिने, ढुङ्गाको विचविचमा रङ्गीचङ्गी ढुङ्गा सुहाउँदो फुलहरु रोपिने, एक ठाउँबाठ अर्को ठाउँ जानलाई ढुंगाको ससाना ढुंङ्गे गेटहरु निर्माण गरिने, पिउने पानीका लागि ढुङ्गे धाराहरु निर्माण गरिने, थुम्का थुम्कामा पोखरीहरु बनाईने, विभिन्न रंगमा ढुङ्गाकै सजिसाजउ गरिने, सगरमाथातिर फोटो खिच्न ढुङ्गाको ससाना भ्यू गेट बनाइने, सवैतिर तारबार तथा वाल लगाईने छ । कलात्मक ढुङ्गाहरुको सिँढीहरु निर्माण, अपाङ्गमैत्री यात्रा मार्ग, डाँडाहरुमा काठको फलैचाहरु निर्माण गरिने नगरप्रमुख राईले बताए ।
यस्तै, ढल र विजुली व्यवस्थापन, पिउने पानी, स्नान घर, विश्रामस्थल, भोजनालयको निर्माण गरिनेछ । ककनीडाँडामा सरकारी जमिन १ सय ६० रोपनी भए पनि भिरमा भएकाले ५६ रोपनीमा ढुङ्गे बगैंचा क्षेत्र बनाउन उपर्युक्त छ । प्राकृतिक रूपमा सिर्जित धार्मिक तथा पर्यटकीय क्षेत्रहरूमा दृश्यावलोकन गर्न पर्यटकहरूका लागि आवतजावत गर्न गाह्रो हुने देखिएकाले ढुङ्गे बगंैचासँगै केवलकारको अवधारणा पनि अगाडी सारिएको छ ।

केवलकार ठाउँसापेक्ष देखिने हुँदा ककनी डाँडाको ढुङ्गे बगंैचा र तुवाचुङ डाँडाको किराँत सांस्कृतिक उद्गमस्थलसँग जोडिएको खण्डमा पर्यटकहरूलाई अवलोकन भ्रमण गर्न सहज हुने देखिन्छ । केवलकार जोड्नका लागि व्यक्तिगत २० रोपनी जग्गा अधिग्रहण गर्नुपर्ने जनाइएको छ । ककनीडाँडाबाट सगरमाथा हिमाल, सोलुखुम्बु, ओखलढुंगा, रामेछाप लगायतका जिल्लाहरु अवलोकन गर्न सकिन्छ ।
२०७६ फागुन ९ गते साँझ ६ :४१ मा प्रकाशित