चिसाङ शेर्पा खोटाङ,
ईन्जिनियर तथा समाजसेवी धर्मराज पोखरेलले हलेसी सामुदायिक रेडियोलाई विधुतीय सामग्री सहयोग गरेका छन् । दिक्तेल रुपाकोट मझुवागढी नगरपालिका–१५ विजयखर्कका पोखरेलले शनिबार रेडियोलाई डेक्सटप कम्प्युटर सहयोग गरेका हुन् ।

ईन्जिनियर पेशालाई अंगालेर विभिन्न क्षेत्रमा सहयोग गर्दै आएका बहुप्रतिभाका धनी पोखरेलले ८२ हजार रुपैयाँको एक थान डेक्सटप कम्प्युटर हलेसी सामुदायिक रेडियोका सञ्चालक समिति अध्यक्ष विष्णु आभुषणलाई हस्तान्तरण गरेका छन् । मोफसलमा रहेर सूचना तथा समाचारमा निरन्तर लागिपरेको रेडियोको प्रोत्साहन स्वरुप कम्प्युटर हस्तान्तरण गरेको पोखरेलले बताए ।
पोखरेलले यसअघि सोही रेडियोलाई नै एकथान ल्यापटप सहयोग गरेका थिए । यस्तै, अनलाईन न्युज पोर्टल समायोजन खबर डटकम र रुपाकोट रेडियोलाई एक/एक थान ल्यापटप/रेर्कडर सहयोग गरेका थिए । सम्पादक समाजका अध्यक्ष तथा अग्रज पत्रकार कृष्ण आचार्य र नेपाल पत्रकार महासंघ शाखा खोटाङका अध्यक्ष दमन राईलाई पनि एक/एक थान रेर्कडर प्रदान गरेका थिए । ईन्जिनियर पेशामा आवद्ध पोखरेल समाजसेवा, राजनीति, गायन र मोडलिङमा सक्रिय छन् ।
२०७६ माघ १८ गते दिउँसो १२ : ५९ मा प्रकाशित