समायोजन खबर खोटाङ,
खोटाङको धार्मिक तथा पर्यटकीयस्थल बराहपोखरी पुग्न उदयपुरको गाईघाटबाट सिधै गाईघाट–बराहपोखरी बस सेवा सुरु गरिएको छ । नेपाल सरकारले सय वटा गन्तव्यको सूचीमा समावेश गरेको बराहपोखरीमा नेपाल भ्रमण वर्ष मनाइरहँदा बिहिबारदेखि गाईघाटबाट सिधा बराहपोखरीसम्मको बस सेवा सुरु गरिएको हो । बराहपोखरी गाउँपालिका–१ बराहपोखरीमा रहेको धार्मिक तथा पर्यटकीयस्थल बराहपोखरी आवत–जावतका लागि गाईघाटबाट हिमाली यातायातले बस सेवा सुरु गरेको बराहपोखरी गाउँपालिकाका अध्यक्ष शालिकराम बञ्जराले बताए ।

गाईघाटबाट यात्रु लिएर बराहपोखरीमा बस आइपुगेपछि गाउँपालिका अध्यक्ष बञ्जरा, उपाध्यक्ष गोमादेबी मगरले रिबन काटेर गाईघाट–बराहपोखरी बस सेवा सुरु भएको औपचारिक घोषणा गरेका हुन् । गाईघाटबाट साउने–रसुवा–कालापानी–ठुलीबेँसी हुँदै बराहपोखरी पुग्ने बस छुट्न थालेपछि पर्यटक तथा दर्शनार्थीलाई तराईबाट उदयपुरहुँदै बराहपोखरी आवत–जावत गर्न सहज भएको छ ।

हाललाई फोक्सिङटारस्थित सुनकोसीमा अस्थायी बेलिब्रिज मात्र भएकाले गाईघाटबाट हिँउदमा मात्र बसमार्फत सिधा बराहपोखरी पुग्न सकिने छ । बस सेवाले धार्मिक तथा पर्यटकीयस्थल बराहपोखरीमा दुर्लभ रातो माछा हेर्नेको संख्या बढ्ने अपेक्षा गरिएको छ ।
२०७६ माघ ४ गते राती ८ :३३ मा प्रकाशित