चिसाङ शेर्पा खोटाङ,
नेपाल विधुत प्राधिकरणका कार्यकारी प्रबन्ध निर्देशक कुलमान घिसिङले दुधकोशी जलाशययुक्त जलविधुत आयोजना मुलुककै १० ठूला जलाशययुक्त आयोजनामध्ये पहिलो भएको बताएका छन् । खोटाङ, ओखलढुंगा र सोलुखुम्बुको सिमानामा बन्न लागेको ६ सय ३५ मेगावटको दुधकोशी जलाशययुक्त जलविधुत आयोजनास्थलको निरीक्षण पछि प्रबन्ध निर्देशक घिसिङले यस्तो बताएका हुन् ।

मंगलबार सेनाको हेलिकोप्टरबाट निरीक्षण सकेर रावाबेंशी गाउँपालिका–३ लामिडाँडाको रबुवाघाटमा गरिएको कार्यक्रममा घिसिङले आयोजना निर्माणमा सहयोगी भूमिका निर्वाह गर्न त्यहाँका स्थानीयहरुलाई आग्रह गर्नुभयो । आयोजनाले खोटाङ, ओखलढुंगा र सोलुखुम्बुका जनताको जीवनमा ठूलो परिवर्तन ल्याउने उनले बताए ।

आयोजना निर्माण गर्दा १ सय ६२ घरपरिवार प्रत्यक्ष र ९ सय ८८ घरपरिवार आंशिक प्रभावित हुनेछन् । आयोजनाबाट १ हजार १५० घर प्रत्यक्ष अप्रत्यक्षरुपमा प्रभावित हुने र ७६ हजार १ सय ९५ रोपनी जमिन प्रभावित हुने घिसिङले बताए । आयोजनाका लागि २ सय २० मिटर अग्लो बाँध निर्माण गरी दुधकोशी नदीमा १७ किलोमिटर, रावा खोलामा ८ किलोमिटर र ठोट्ने खोलामा ५.५ किलोमिटर लामो जलाशय बनाइने छ । यस्तै १३ किलोमिटर लामो सुरुङ मार्ग हुनेछ ।

आयोजनाबाट वर्षा याममा २ अर्ब ८ करोड तथा सुख्खा याममा १ अर्ब ३६ करोड युनिट बिजुली उत्पादन हुनेछ । उत्पादित बिजुली प्रस्तावित सुनकोसी–ढल्केबर ४ सय केभी प्रसारण लाइनमार्फत राष्ट्रिय प्रसारण प्रणालीमा जोडिनेछ । कार्यक्रममा खोटाङ, ओखलढुंगा र सोलुखुम्बुका सांसदहरुले आयोजना निर्माणमा सरकारलाई सघाउने प्रतिवद्धता जनाएका छन् । करीव १ खर्ब ६० अर्ब लागतमा निर्माण सम्पन्न गर्ने लक्ष्य राखिएको दुधकोशी आयोजनाका लागि एसियाली विकास बैंक (एडिबी) ले ६० अर्ब रुपैयाँ लगानी गर्ने प्रतिबद्धता जनाइसकेको छ ।

यो पनि पढ्नुहोस

प्रभावितलाई पर्याप्त मुआब्जा र पुर्नबासको व्यवस्था हुन्छ : मन्त्री पुन

२०७६ पौष २२ गते राती ९ :०३ मा प्रकाशित