चिसाङ शेर्पा खोटाङ,
दिक्तेल–पञ्चमीबजार सिधा यातायात सुरु भएको छ । साकेला गाउँपालिका–५ मात्तिमको तावाखोला पश्चिमतर्फ भलबाढीले भत्काएको सडक मर्मतपछि सिधा यातायात सुरुवात भएको हो ।

ग्याभिङ हालिएको करीव ४५ मिटर सडक भलबाढीले भत्काएपछि भौतिक पुर्वाधार विकास मन्त्रालय उदयपुरसँग सम्झौता र गाउँपालिकाको साझेदारीमा सडक बनेपछि यातायात सुरु भएको जनाइएको छ । दिक्तेलको अस्पताल चोकबाट प्रत्येक दिन दिउँसो पञ्चमीबजारका लागि बस छुट्ने गरेको एकजना यातायात व्यावसायीले बताए ।

उनका अनुसार दिक्तेलबाट पञ्चमीबजारका लागि ४५० भाडादर निर्धारण गरिएको छ । यातायात सुरु भएपछि दिक्तेल र दिप्रुङ चुईचुम्मा गाउँपालिकासहित अन्य गाउँपालिकाका स्थानीयहरुलाई यात्रा गर्न सजिलो भएको छ । दिक्तेल–पञ्चमीबजार छोटो दुरीमा यातायात सुरु भएपछि किसानहरुले उत्पादन गरेका कृषिउपजले बजार पाउने दिप्रुङ चुइचुम्मा गाउँपालिका अध्यक्ष भूपेन्द्र राईले बताए । दिक्तेल–मानेभन्ज्याङमा यसअघि नै यातायात सञ्चालनमा छ ।
२०७६ मंसिर ८ गते साँझ ५ :४४ मा प्रकाशित