चिसाङ शेर्पा खोटाङ,
खोटाङको दिप्रुङ चुइचुम्मा गाउँपालिकामा सिंचाई योजनाको शिलान्यास गरिएको छ । गाउँपालिकाको छितापोखरी र खोटेहाङ गाउँपालिका–५चिप्रिङको ओखटेस्थित टुवाखेलाबाट छितापाखरी–पञ्चमीबजार–बतासेसम्म सञ्चालन हुने लोकतान्त्रिक सिंचाई योजनाको शिलान्यास गरिएको हो ।

१ नम्बर प्रदेश जलस्रोत तथा सिंचाई डिभिजनको ७ करोड ७२ लाख बजेटमा निर्माण हुने योजनाको शनिबार गाउँपालिका अध्यक्ष भूपेन्द्र राईले शिलान्यास गरेका छन् । शिलान्याससँगै ३० महिनामा सम्पन्न गर्नेगरी बिवश ईन्टरनेशनल कन्ट्रक्सन काठमाण्डौले काम थालेको गाउँपालिकाका आईटी अफिसर मणिचन्द्र राईले जानकारी दिए । गत साउनमा निर्माण कम्पनी र सिंचाई डिभिजन कार्यालयबिच सम्झौता भएको थियो ।

१३ किलोमिटरमा सञ्चालन हुने सिंचाई योजनाको मुहानदेखी ९ किलोमिटरसम्म निर्माण कम्पनीले पाइप जडान, आरसीसी, पिसीसी, ग्याबिङ वाल, मेसिनरी वाल लगायतका स्टक्चरका काम गर्नेछ । बाँकी काम उपभोक्ता समितिले गर्ने जनाइएको छ । सिंचाई योजनाले छितापोखरीको आधा भूभाग, सप्तेश्वर छितापोखरी र बतासेका स्थानीय लाभान्वित हुने गाउँपालिका अध्यक्ष राईले बताए ।

योजनाको काम समयमै सकेर पानीको समस्या भोगिरहेका स्थानीयहरुलाई सुविधा दिन निर्माण उपभोक्ता समितिलाई गाउँपालिका उपाध्यक्ष सपना राईले आग्रह गरिन् । आफ्नो पालिकामा निर्माण हुने योजनामा स्थानीय सरकारको तर्फबाट गुणस्तरीयतामा सधै ताकेता गरिने गाउँपालिका अध्यक्ष राईले बताए ।
२०७६ मंसिर ७ गते साँझ ६ः१७ मा प्रकाशित