समायोजन खबर काठमाण्डौ,
महानिरीक्षक कप महिला राष्ट्रिय भलिबल प्रतियोगिताको उपाधि आयोजक सशस्त्र प्रहरीको एपीएफ क्लबले जितेको छ । आज हलचोकस्थित सशस्त्र प्रहरीको मुख्यालयमा भएको फाइनल खेलमा न्यू डायमन्ड एकेडेमीलाई ३–० को सोझो सेटमा हराउँदै सशस्त्रले उपाधि जितेको हो । सशस्त्रले खेल २५–१२, २५–११ र २५–११ को सोझो सेटमा जित्यो ।

यो सँगै सशस्त्रले एकै वर्षमा खेलेका ११ फाइनलबाट १० ओटा उपाधि जितेको छ । उपाधिसँगै सशस्त्रले दुई लाख ५० हजार रुपैयाँ पुरस्कार प्राप्त गरेको छ । उपविजेता बनेको न्यू डायमन्डले एक लाख २५ हजार रुपैयाँ पायो । यस्तै, तेस्रो भएको नेपाल पुलिस क्लबले ५० हजार रुपैयाँ जित्यो । आज भएको तेस्रो स्थानको भिडन्तमा पुलिसले त्रिभुवन आर्मी क्लबलाई ३–२ को सेटमा हराएको थियो । सशस्त्र प्रहरी बलले विगत सात वर्षदेखि आफ्ना महानिरीक्षकका नाममा राष्ट्रिय महिला भलिबल प्रतियोगिता आयोजना गर्दै आएको छ ।
२०७५ चैत्र १५ गते साँझ ७ :५९ मा प्रकाशित